Foto: Úkimet
Úkimet otyrysynda ǵylym jáne joǵary bilim ministri Saiasat Nurbek «Ekologiia, qorshaǵan ortany qorǵaý jáne tabiǵi resýrstardy utymdy paidalaný» baǵyty Qazaqstannyń 2025-2027 jyldarǵa arnalǵan ǵylymi damýynyń 7 basymdyǵynyń qataryna kirgenin habarlady.
Onyń aitýynsha osy baǵyt boiynsha 3 jyldyq granttyq qarjylandyrý aiasynda 318 joba, al baǵdarlamalyq-nysanaly qarjylandyrý sheńberinde 43 baǵdarlama iske asyrylýda. Sonymen qatar ǵylymi nátijelerdi kommertsiialandyrý konkýrsy aiasynda jasyl tehnologiialarǵa qatysty 23 joba júzege asyrylyp jatyr.
Mysaly, mańyzdy jobalardyń biri – «Elektr kólikterin zariadtaý stantsiialaryn jańǵyrtý». Bul joba aiasynda respýblika boiynsha 16 zariadtaý stansasy ornatylyp, jabdyqtar men baǵdarlamalyq qamtamasyz etýdi jetkizýge kelisimsharttar jasady. Joba elektr kólikterine arnalǵan infraqurylymdy damytýǵa jáne kómirtegi shyǵaryndylaryn azaitýǵa baǵyttalǵan.
Taǵy bir joba – «Jasyl» tehnologiia standarttaryna sáikes keletin gaz tazartý jabdyqtaryn engizý boiynsha jańa óndiristi uiymdastyrý». Jobanyń negizgi artyqshylyǵy – ónimdiligi joǵary, paidalaný shyǵyndary tómen zamanaýi gaz tazartý júieleriniń jobasyn ázirleý.
Sondai-aq ǵylymi ázirlemelerdi kommertsiialandyrý sheńberinde birqatar joǵary oqý oryndarynda ekologiiamen bailanysty jobalar iske asyrylýda. Mysaly, Q.A. Iasaýi atyndaǵy Halyqaralyq qazaq-túrik ýniversitetiniń botanikalyq baǵynda keptirilgen alma óndirý jobasy júzege asyrylyp jatyr. Qorqyt ata atyndaǵy Qyzylorda ýniversitetiniń botanikalyq baǵynda qiiar, bolgar buryshy jáne kók shóp jylyna eki ret, qyzanaq bir ret jinalady. Saiasat Nurbek mundai jobalar bilim berý men óndiristiń bailanysyn nyǵaitatynyn atap ótti.
