«Qazposhta» AQ atqarýshy direktory Dáýren Turysbekov dronmen júk tasymaldaý baǵytyn damytý jóninde túsinik berdi, dep habarlaidy QazAqparat.
«Úsh jyl buryn biz shalǵai eldi mekenderge poshtany dronmen jetkizýdi bastadyq. Atalǵan jobany iske asyrý jalǵasýda. Degenmen bul joba kóktem men kúz aralyǵyn iske asyrylady. Qalǵan kezeńde (qys mezgilinde kólikpen) kúndelikti logistikalyq baǵdarmen jetkiziledi», - dedi D. Turysbekov Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda.
Onyń sózine qaraǵanda, atalǵan qyzmetti aýtsorsingtik kompaniia atqarady. «Qazposhta» kompaniiasymen olar shartqa otyrǵannan keiin, tiisti qyzmetti júzege asyrady. Negizinen, bul qyzmet Jambyl, Qyzylorda jáne Túrkistan oblystarynda kórsetilip keledi.
«Dron hattar men gazetterdi tasymaldaidy. Atalǵan qyzmetti kórsetý jalǵasa beredi, sebebi joba aitarlyqtai jaqsy qarqynmen iske asyrylýda. Bizge shalǵai eldi mekenderge poshtany dron arqyly tasymaldaý tiimdirek. Sondyqtan qyzmettiń osy túri keńeitiledi», - dedi «Qazposhta» ókili.
