Qazaqstan birtindep polietilen paketterden bas tartady. Bul týraly Parlament Senatynda tilshilerge QR Energetika vitse-ministri Sábit Nurlybai málim etti, dep habarlaidy "Ult aqparat".
«Biz polietilen paketterdi paidalanýdan birtindep júieli túrde bas tartýymyz kerek. Bul baǵyttaǵy qadamdarǵa tiisti ýaqyt kerek. Sáikesinshe, ony iske asyrý úshin balamaly ónimderdi daiyndaýǵa tiistimiz. Atap aitqanda, biz óte mańyzdy qadamdy jasadyq, iaǵni sýpermerketterde polietilen paketteri tegin taratylmaýyna qol jetkizdik. Ázirlenip jatqan Ekologiialyq kodeks aiasynda atalǵan máseleni pysyqtaityn bolamyz», - dedi Sábit Nurlybai.
Bul turǵyda vitse-ministr elimizde polietilen paketterine tyiym salý sharalary aldaǵy 5-10 jylda engizilýi múmkin ekenin aitty.
Eske sala keteiik, QR Energetika ministri Qanat Bozymbaev polietilen paketterdi qoldanystan shyǵarýǵa qatysty pikir bildirgen edi.
«Túbinde polietilen paketterge tyiym salamyz dep oilaimyn. Óitkeni, polietilen paketterge, qorshaǵan ortany qorǵaýǵa qatysty problema bar jáne ol barynsha kúrdeli. Qaita óńdeý áli talapqa sai emes. Kórshi Ózbekstanda sharalar qabyldanyp jatyr. Biraq, bizdiń ekonomikamyz birden alyp tyiym salýǵa áli daiyn emes. Biz tyiym salý sharalaryna barmaimyz, birneshe kezeńge bólip tastaimyz», - dedi ministr.
Onyń aitýynsha, eń aldymen mundai paketterdi tegin berý toqtatylady. Iaǵni, adamdar atalǵan paketterge aqsha tóleýi tiis.
