Foto: matritca.kz
1 sáýirden bastap QR Oqý-aǵartý ministrligi Ulttyq bilim berý derekter qorynda pedagogterdi mektepke jumysqa qabyldaý boiynsha jańa modýldi iske qosady. Bul shara sybailas jemqorlyqqa qarsy jáne konkýrstyq rásimderdi ashyq ótkizýge baǵyttalǵan, dep habarlaidy "Ult aqparat".
Sondai-aq pedagogterdi attestattaýda qujattardy tapsyrý boiynsha da avtomattandyrý engizilýde.
Endi pedagogterdiń barlyq málimetteri «Pedagog portfoliosy» modýlinde jinaqtalady. Munda pedagog týraly, onyń bilimi, densaýlyq jaǵdaiy, jumys tájiribesi, quqyq buzýshylyqtar, attestattaýdan ótý, marapattary jáne tálimgerlik pen tsifrlyq qujattar týraly elektrondyq aqparat saqtalady.
«Ashyqtyq pen eseptiliktiń bolýy sybailas jemqorlyqqa qarsy kúreste basty ról atqarady. Osy modýlderdi engize otyryp, pedagogterdi jumysqa qabyldaý kezinde qaǵaz júzindegi qujat ainalymyn jáne sybailas jemqorlyq táýekelderin tolyq joiý josparlanýda. Júieni iske qosý aldynda basqarma, bólimder men bilim berý uiymdarynyń mamandary úshin oqytý uiymdastyryldy», - deidi QR OAM Tsifrlandyrý departamenti direktorynyń orynbasary Maira Maralbaeva.
Eske sala keteiik, buǵan deiin atalǵan modýl Shymkent qalasynda jáne Qaraǵandy oblysynyń Shahtinsk qalasynda synaqtan ótti.
Sondai-aq jumys izdeý jáne qajetti personaldy tańdaý boiynsha elimizdiń basqa óńirlerinde de ashyqtyq jaǵdai jasaý úshin UBDQ-nyń «Elektrondyq eńbek birjasy» platformasymen ózara integratsiiasy josparlanǵan.
