Mysyr ókilderi Qazaqstanda dini mamandardy daiarlaý jáne imamdardy biliktiligin arttyrýǵa qoldaý kórsetýge daiyn. Bul týraly óziniń Facebook paraqshasynda QR Parlamenti Senatynyń tóraǵasy Máýlen Áshimbaev jazdy, dep habarlaidy QazAqparat.
Senat tóraǵasy jazbasynda Mysyr eline sapary barysy týraly baiandaidy.
«Taiaýda Prezidentimizdiń tapsyrmasymen Mysyr eline resmi saparmen bardyq.
Qazaqstan úshin Mysyr arab jáne islam álemindegi mańyzdy seriktes memleketterdiń biri. Eki eldi bailanystyratyn ortaq qundylyqtar az emes. Sonyń ishindegi eń mańyzdysy islam dini ekeni sózsiz.
Islam ata-babamyzdyń dini. Keńes zamanynda bul baǵytta túrli qiyndyqtar men kedergiler bolǵany belgili. Tek Táýelsizdik alǵannan keiin ǵana asyl dinimizdi keńinen dáripteýge jol ashyldy. Osy rette bizder úshin islamtanýshy mamandar daiarlaý isinde Mysyr eliniń, onyń ishinde álemge áigili ál-Azhar ýniversitetiniń kómegi erekshe boldy. Mysyrdyń qoldaýymen elimizde «Nur-Múbárak» Egipet Islam ýniversiteti ashyldy.
Qazirgi tańda ál-Azhar ýniversiteti islamnyń sýnnittik baǵytyn nasihattaityn jáne kásibi din mamandaryn daiarlaityn dúnie júzindegi eń iri oqý orny. H ǵasyrda negizi qalanǵan bilim ordasy búginde búkil islam álemi úshin aǵartýshy, ǵylymi jáne rýhani ortalyq retinde asa mańyzdy.
Islam – ejelden beibitshilik pen kelisimdi dáripteitin din. Osy rette ál-Azhardyń dini ekstremizmmen kúres jumystary da airyqsha mánge ie ekeni belgili. «Qańtar oqiǵasynan» keiin elimizde atalǵan máseleniń ózektiligi arta tústi. Sondyqtan bul salada osy ortalyqtyń tájiribesine súienýimiz qajet. Ál-Azhardyń Bas imamy, sheih Ahmed at-Taiebpen kezdesýde osy máselege arnaiy toqtaldyq»,-deidi Máýlen Áshimbaev.
Sondai-aq ol sózinde Sheih maman daiarlaýda, imamdardyń biliktiligin arttyrýda Qazaqstanǵa qoldaý kórsetýdi odan ári arttyratynyn jáne ekstremizm ideologiiasymen kúreste bizdiń elge júieli túrde kómektesetinin jetkizgenin aitady. Aldaǵy ýaqytta bul baǵytta birlesip, nátijeli jumys isteimiz dep senemiz.
Sheih Ahmed at-Taieb Qazaqstannyń Álemdik jáne dástúrli dinder liderleriniń Sezin ótkizý bastamasyna qoldaý bildirip, onyń qazirgidei geosaiasi jáne dini kózqarastar shielenisken kúrdeli kezeńde asa mańyzdy ról atqaratynyn aitty. Kezdesýde Sheihke Prezidentimizdiń Sezge shaqyrý hatyn resmi túrde tapsyrdym.
Sonymen qatar ál-Azhar ýniversitetinde oqyp júrgen qazaqstandyq stýdenttermen de arnaiy kezdestim.
Islamnan bólek, Qazaqstan men Mysyrdy bailanystyratyn tarihi tulǵalar bar. Solardyń ishinde Sultan Beibarystyń esimi erekshe atalady. Zamanynda Mysyrdyń sultany bolǵan Beibarys babamyz sol óńirdiń ósip-órkendeýine úlken eńbek sińirdi.
Búginde Kair qalasynda Beibarys sultan saldyrǵan meshit bar. Sapar aiasynda rýhani ortalyqty ziiarat etip, babamyzdyń rýhyna quran baǵyshtadyq. Bul meshit osy eldegi eń kórnekti ári tarihi jádigerlerdiń biri. Qazaqstan 2007 jyly Mysyrmen meshitti qalpyna keltirý boiynsha úkimetaralyq kelisimge qol qoidy. Soǵan sáikes eki memleket te qarjy bólip, tiisti jumystar qolǵa alynǵan edi. Degenmen, túrli jaǵdailarǵa bailanysty jumys biraz turalap qaldy.
Mysyrdyń Ýaqyftar ministri Muhammed Muhtar Jumamen kezdesýde osy jaǵdaiǵa nazar aýdaryp, qaita qalpyna keltirý jumystaryna basymdyq berý máselesin qozǵadyq. Kezdesýde Ministr Mysyr tarapy bul jumysqa qosymsha 2 million AQSh dollaryn bóletinin aitty jáne jobanyń aiaqtalýyn óz baqylaýynda ustaitynyn jetkizdi. Kelesi jyly Beibarys Sultannyń týǵanyna 800 jyl tolatynyn eskersek, bul qýanyshty jańalyq ekeni sózsiz.
Mysyr Parlamenti Senatynyń Tóraǵasy Ábdel Ýahab Ábdel Razekpen kezdesýimizde eki eldiń saýda-ekonomikalyq, týrizm, mádeni-gýmanitarlyq bailanystaryn arttyrý jáne parlamentaralyq yntymaqtastyqty nyǵaitý máselelerine toqtaldyq. Osy eldiń Bas múftii Ábdel Kárim Allammen kezdesýde de rýhani jáne dini baǵyttaǵy qatynastarǵa nazar aýdardyq.
«Aldaǵy ýaqytta bul sapar eki eldiń yntymaqtastyǵyn arttyrýǵa, parlamentaralyq qarym-qatynasty kúsheitýge jáne dinaralyq dialog pen dini ekstremizmmen kúres salasynda birlesip áreket etýge óz septigin tigizedi dep senemiz. Ol úshin Parlament Senaty elimizdiń Syrtqy ister ministrligimen jáne Qazaqstannyń Mysyrdaǵy Elshiligimen birlese otyryp, qajetti jumystardy ári qarai jalǵastyra beredi»,-dedi Senat tóraǵasy.
