Parlament Májilisiniń jalpy otyrysynda Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova pandemiiamen kúreste daǵdarysqa qarsy qarajattyń tiimdi igerilý aýditi qashan bolatynyn aitty, dep habarlaidy QazAqparat.
Aita keteiik, jalpy otyrysta QR Úkimetiniń jáne Respýblikalyq biýdjettiń atqarylýyn baqylaý jónindegi esep komitetiniń 2020 jylǵy respýblikalyq biýdjettiń atqarylýy týraly esepteri qaralyp jatyr.
«Densaýlyq saqtaý ministrligi tarapynan pandemiiamen kúreste daǵdarysqa qarsy qarajattyń igerilýine qatysty toqtalsaq, bul turǵyda quqyq qorǵaý organdary qujattardy tekserýge alǵan bolatyn. Protsessýaldyq is-qimyldar aiaqtalǵannan keiin, biz tiimdilik aýditin júrgizemiz», - dedi Natalia Godýnova.
Onyń aitýynsha, jumyssyzdyq deńgeiin 4,9 paiyz shamasynda saqtap qalý múmkin bolǵanymen, bastapqyda shyǵystardyń eleýli bóligi ýaqytsha jumys oryndaryn qurýǵa negizdelgen. Jumysqa ornalastyrýdyń ortasha kezeńi 1-den 3 aiǵa deiin quraǵan.
«Daǵdarysqa qarsy júzege asyrýǵa qabyldanǵan jobalardyń tek 14 paiyzy uzaq merzimdi ekonomikalyq avtivter men nysandardy qurýǵa baǵyttaldy. Bul turǵyda Shyǵys Qazaqstan oblysynan basqalarynda osyndai jaǵdai oryn aldy. Qalǵandary aǵymdaǵy jóndeý jumystary, kógaldandyrý jáne osy tektes is-sharalardy atqarǵan. Osy oraida odan bolǵan áser qysqa merzimdi ekeni túsinikti», - dedi ol.
«Jańa óndirister qurý, qoldanystaǵy qýattardy keńeitý boiynsha jobalar óńirler tarapynan qarjylandyrý úshin usynylmady. Alaida Úkimet tiisti sharalardy qabyldap, qazirgi kezde memlekettik resýrstardy bosqa jumsaýǵa jol bermeitin talaptar bekitildi», - dedi N. Godýnova.
