QR Ishki ister ministriniń orynbasary Murat Baimuqashev elimizde otbasylyq janjal shyǵaryp, zorlyq kórsetken adamdarǵa qandai jaza túrleri qarastyrylǵanyn aitty, dep habarlaidy QazAqparat tilshisi.
«Biz áielder men balalardy qorǵaý úshin júieli sharalar qabyldap jatyrmyz. 2009 jyly qabyldanǵan zańǵa qoldaný praktikasy men aǵymdaǵy jaǵdaidy eskere otyryp, túzetýler men ózgerister engizildi. Iaǵni, zań únemi jańartylyp otyrady. Politsiia qyzmetkerleriniń ókilettiligi de keńeitildi. Osy tusta otbasylyq quqyq buzýshylyqqa jol bergen tulǵalarǵa qatysty jaýapkershilik kúsheitildi», - dedi Murat Baimuqashev elordada ótip jatqan «Qazaqstandaǵy otbasy jáne otbasylyq saiasat institýty: máseleler, úrdister men keleshegi» atty halyqaralyq konferentsiiada.
Onyń aitýynsha, endigi ýaqytta politsiia qyzmetkeri turmystyq zorlyq-zombylyq kórsetip, otbasylyq janjal shyǵarǵan adamdy jábirlenýshige jaqyndatpaýǵa, tipti telefonmen sóilesýge de tyiym salýǵa quqyly.
«Bul shekteýdiń qoldanylý merzimi 1 ai. Ol arnaiy qorǵaý nusqamasy retinde resimdeledi. Eger tyiym men shekteýdi buzǵan jaǵdaida 5 táýlikke deiin qamaýǵa alý qarastyrylǵan. Sonymen qatar turmystyq janjal barysynda uryp-soǵý nemese jeńil dene jaraqaty bolǵany anyqtalsa, onda aiypty 10 nemese 15 táýlikke deiin ákimshilik qamaýǵa alynady», - deidi ol.
Sondai-aq, ministr orynbasary eger jábir kórýshi negizgi aryzdan bólek, ózin qorǵaý maqsatynda qosymsha ótinish, talap bildirse, ondai jaǵdaida aiyptyǵa jaza qatańdai túsetinin aitty.
«Atap aitqanda, aiyptyǵa qarýdy saqtaý men alyp júrýge nemese úide alkogol ishýge tyiym salynýy múmkin. Eger aiypty bólek úide tursa, onda sot azamatty 10 kún ishinde bosatýǵa quqyly. Bul tyiymdardyń qoldanylý merzimi úsh aidan bir jylǵa deiin bolýy múmkin. Jáne tártip buzýshynyń minez-qulqy qadaǵalaýǵa alynyp, ol ýchaskelik politsiia inspektorynyń profilaktikalyq esebine alynyp, baqylaýyna qoiylady», - dep túiindedi M.Baimuqashev.
