Foto: QR TSM
Túrkistan qalasynda Memleket basshysynyń tapsyrmasyn oryndaý aiasynda biregei sport nysany – Esý arnasy paidalanýǵa berildi, dep habarlaidy Ult.kz.
Sport kesheniniń Ortalyq Aziiada teńdesi joq jáne tolyqtai Halyqaralyq kanoe federatsiiasy (ICF) men Halyqaralyq akademiialyq esý federatsiiasynyń (FISA) standarttaryna sáikes keledi.
Nysannyń ashylý saltanatyna Qazaqstanǵa arnaiy kelgen ICF prezidenti Tomas Konietstsko sport keshenine joǵary baǵasyn berdi.
«Búgin Memleket basshysynyń tapsyrmasy boiynsha elimizdegi eń iri sport nysandarynyń birin ashyp otyrmyz. Qurylysy halyqaralyq talaptarǵa sai júrgizilgen bul sport kesheninde endi halyqaralyq jarystardy qabyldai alamyz. Nysan tek kásibi sportshylarǵa ǵana emes, qala turǵyndaryna da qoljetimdi. Óńir turǵyndary úshin munda voleibol, fýtbol, basketbol alańdary men qalalyq jaǵajai ashylady», – dedi Týrizm jáne sport ministri Erbol Myrzabosynov saltanatty ashylý rásiminde.
Qazirgi tańda elimizdiń 12 óńirinde akademiialyq esý, baidarka men kanoede esý, esý slalomy sporty damyp keledi. Bul sport túrlerimen júieli túrde 6 131 adam ainalysady. Olarmen 174 jattyqtyrýshy jumys isteidi.
Akademiialyq esý – eń kóp medal júlde sarapqa salynatyn sport túrleriniń biri. Máselen, Olimpiadada 14 jiyntyq medal úlestiriledi. Al álem chempionattarynda 20-dan asa baǵdarlama bar. Osylaisha bir eldiń sportshysy bir mezette birneshe sanatta júlde alyp, óz myqtylyǵyn dáleldei alady. Birneshe baǵdarlama arqasynda akademiialyq esý ári jeke sheberlikti, ári komandalyq jumysty damytýǵa múmkindik beredi.
Foto: QR TSM
Túrkistandaǵy esý arnasynyń jalpy aýmaǵy – 100 gektar, uzyndyǵy shamamen 2,5 shaqyrym. Biregei sport kesheni akademiialyq esý, baidarka men kanoe boiynsha álemdik deńgeidegi jarystardan bastap Álem jáne Aziia kýbogine deiingi týrnirlerdi ótkizýge jáne sportshylardyń turaqty jattyǵý jasaýyna múmkindik beredi. Sonymen qatar arna sýy qaladaǵy sýarmaly júiege, jasyl beldeýdi sýarýǵa qoldanylady. Al arna aýmaǵynda uzyndyǵy 1 shaqyrymdyq qalalyq jaǵajai, qonaq úi, kórermenderge arnalǵan tribýna ornalasqan.
Joba Túrkistannyń sporttyq, ekologiialyq jáne týristik damýyna zor úles qosady ári elimizdegi akademiialyq esý sportynyń jan-jaqty órkendeýine jaǵdai jasaidy. Túrkistandaǵy esý arnasy ulttyq quramalardy daiarlaityn jáne jas sportshylardy tárbieleitin negizgi infraqurylymdyq ortalyqqa ainalmaq.
Aita keteiik, sport infraqurylymyn damytý – memlekettik saiasattyń basym baǵyttarynyń biri. Biyl jyl sońyna deiin taǵy bir iri nysan – Astanadaǵy Ulttyq sport ýniversiteti paidalanýǵa beriledi dep josparlanǵan.
