Áleýmettik jelilerde Qazaqstandaǵy ormandardyń joiylyp jatqany jaily aqparat tarady. Osyǵan bailanysty Ekologiia ministrliginiń orman sharýashylyǵy jáne janýarlar dúniesi komiteti málimet taratty, dep habarlaidy "Ult aqparat".
Qazaqstan shaǵyn ormandy el sanalady. Qazirgi ýaqytta orman qorynyń aýdany (barlyq ormandar men orman sharýashylyǵyn júrgizýge arnalǵan jerlerdiń jiyntyǵy) 30,4 mln gektardy quraidy, onyń ishinde 13,3 mln gektary ormanmen qamtylǵan (el aýmaǵynyń 11%), ormandylyq kórsetkishi - 4,9%.
Qazaqstanda ormandar birkelki ornalaspaǵan. Orman ósimdikteriniń túrleri tabiǵi aimaqtardyń ártúrliligimen anyqtalady.
Shóldi aimaqta sekseýil ormandary ósedi. Taýly ormandardyń negizgi bóligi Altai, Jońǵar jáne Ile Alataýynyń qara qylqandy ekpelerimen kómkerilgen.
Dala jáne ormandy dala aimaqtarynyń jazyq bóliginde qaiyń-kókterek shoq ormandar, qaraǵaily ormandar, Ertis óńiriniń jaldy ormandary ósedi.
Sekseýil ormandary ormanmen qamtylǵan barlyq alqaptyń 50,5% - yn, qylqan japyraqty ekpeler - 13,5% - yn, jumsaq japyraqty ekpeler-11,7% - yn quraidy.
2000 jyly orman qorynyń aýdany 26,5 mln. ga qurady, onyń 11,4 mln.ga - ormanmen qamtylǵan, ormandylyǵy - 4,1%. 2015 jyly bul kórsetkishter tiisinshe 29,3 mln.ga, 12,6 mln. ga jáne 4,6% - dy qurady.
2020 jyly ormanmen qamtylǵan alqap 1,6 mln. gektarǵa ulǵaiyp, 13,1 mln. gektardy quraǵanyn atap ótken jón.
Osylaisha, 2001-2020 jyldary el 60,1 myń ga orman jamylǵysyn joǵaltty degen aqparat rastalmady. Kerisinshe, jalpy orman alqaptarynyń ulǵaiý úrdisi baiqalady.
Buǵan óńirlerdegi orman qorynyń jai-kúii týraly derekter dálel.
Máselen, Shyǵys Qazaqstan oblysynda búginde orman qorynyń aýdany 3,8 mln.gektardy quraidy, onyń 2 mln gektary ormanmen qamtylǵan.
2001 jylmen salystyrǵanda bul kórsetkishter tiisinshe 349,3 myń ga jáne 252,2 myń ga ulǵaidy.
Qostanai jáne Soltústik Qazaqstan oblystarynda orman qorlarynyń aýdany 2001 jyldan bastap 621,1 myń gektarǵa, ormanmen qamtylǵandar - 54,8 myń gektarǵa ulǵaidy.
Búginde bul kórsetkishter eki oblys boiynsha tiisinshe 1,8 mln ga jáne 815 myń ga quraidy.
Aqmola oblysynyń orman qory búginde 1 mln. gektardan astam aýmaqty alyp jatyr, onyń ishinde 384,8 myń gektary ormanmen qamtylǵan, kórsetkishterdiń ósýi tiisinshe 251,3 myń gektardy jáne 66,4 myń gektardy qurady.
Qazirgi ýaqytta Almaty oblysynda orman qorynyń aýdany 5411,5 myń gektardy quraidy, onyń 2005,9 myń gektary ormanmen qamtylǵan.
Kórsetkishterdiń ósýi tiisinshe 556,9 myń ga jáne 211,5 myń ga quraidy.
Joǵaryda aitylǵandardy qorytyndylai kele, komitet jelide taralǵan aqparat shyndyqqa janaspaitynyn habarlaidy.
