Eńbek jáne halyqty áleýmettik qorǵaý ministrligi shetelde turatyn etnikalyq qazaqtardy atajurtyna qaitarý úshin azamattyq alý tártibin jyldamdatý jáne jeńildetýdi josparlap otyr. Bul týraly búgin halyqqa esep berý kezdesýinde vedomstvo basshysy Madina Ábilqasymova málimdedi, dep habarlaidy Sputnik Qazaqstan tilshisi.
Ministr etnikalyq qazaqtardy Qazaqstanǵa kóshirý nemese tarihi otanyna qaitarý demografiiaǵa oń áser etetinin atap ótti.
"Shetelde turatyn etnikalyq qazaqtarǵa Qazaqstanǵa qonys aýdarý úshin jaǵdai jasaý maqsatynda azamattyq alýdyń jedeldetilgen (jeńildetilgen) tártibin engizý qarastyrylyp otyr. Sondai-aq olarǵa qandai da bir ruqsatsyz jáne oralman mártebesiniń bar-joǵyna qaramastan jumysqa ornalasý quqyǵy usynylady", —dedi Ábilqasymova esep berý kezdesýinde.
Sonymen qatar, onyń aitýynsha, oralmandarǵa jańa ortaǵa beiimdelýine járdemdesý maqsatynda migranttardy aqparattyq jáne quqyqtyq qoldaý ortalyqtary qurylady. Al eńbek resýrstary tapshy óńirlerde til úirený kýrstary uiymdastyrylmaq.
"Jyl saiyn Qazaqstanǵa eń kemi 20 myń oralman keledi dep josparlap otyrmyz", — dedi ministr.
Sonymen qatar, Ábilqasymova ministrlik el ekonomikasynda suranysqa ie ártúrli profildi bilikti mamandarǵa uzaq merzimdik jaǵdai jasaý negizgi basymdyqtardyń biri ekenin atap ótti.
"Qoldanystaǵy kóshi-qon zańnamasy elimizdiń ekonomikalyq, áleýmettik, demografiialyq damýyndaǵy qajettilikter men jumys berýshilerdiń múddesine tolyǵymen sáikes kelmeidi. Zań a shetelden ýaqytsha jumys kúshin tartýǵa baǵyttalǵan jáne onda eńbek migranttary men oralmandardy ortaǵa beiimdeý sharalary kózdelmegen", — dedi vedomstvo basshysy.
Kóshi-qon saiasatynyń tujyrymdamasyn júzege asyrý boiynsha is-sharalar josparyna sáikes biyl kóshi-qon protsesteriniń tiimdiligin arttyrý boiynsha sharalar qabyldanady.
"Ekonomikaǵa qajetti sheteldik jumys kúshin tartý salasynda mynalar qarastyrylǵan: jumys ruqsattaryn berý júiesin jetildirý; qajettilikti baǵalaýdyń tiimdi tetikterin qurý jáne sheteldik jumys kúshin tartý tetikterin jetildirý; iskerlik maqsatta keletin, investitsiialyq jáne kásipkerlik qyzmetke qatysatyn sheteldik azamattardyń el aýmaǵyna kirý erejelerin jeńildetý. Bul sharalar el ekonomikasyn jyl saiyn eń kemi 40 myń bilikti sheteldik mamanmen qamtýǵa múmkindik beredi", — dedi Ábilqasymova.
Ministr atalǵan sharalar qazirgi tańda kóshi-qon protsesterin retteý máseleleri boiynsha zań jobasynyń tujyrymdamasynda eskeriletinin atap ótti.
