«Qazaqstan onkologiiasy. Keshe. Búgin. Erteń» atty halyqaralyq ǵylymi-praktikalyq konferentsiia barysynda «Qazaq onkologiia jáne radiologiia ǵylymi-zertteý institýty» AQ basqarma tóraiymy, QR Ulttyq ǵylym akademiiasynyń akademigi, meditsina ǵylymdarynyń doktory Diliara Qaidarova institýttyń damýy týraly aitty, dep habarlaidy QazAqparat.
Onyń sózine qaraǵanda, 1959 jylǵa deiin Qazaqstanda qaterli isikti emdeitin meditsinalyq mekeme bolmaǵan. Tek alǵash ret 1960 jyly 5 shildede qurylǵan. Ony Sáken Nuǵmanov basqardy.
«1960 jyly munda bir ǵana ǵimarat boldy. Qazir onyń sany 8-ge jetti. Búgingi kúni bul ǵimarattar jańashyldyq pen jańarýdy qajet etedi. Alaida bizdiń kadrlyq quram myqty. Aldyńǵy qatardaǵylardyń biri desek te bolady. Munda oqyǵan jáne taǵylymdamadan ótken jastar elimizdiń barlyq aimaqtarynda jumys istep jatyr. Olar óńirlerdegi onkologiialyq qyzmet deńgeiin kóteredi. Bizdiń mamandar qazir Amerika, Ispaniia, Italiiada bilim alýda», - deidi Diliara Qaidarova.
Sonymen qatar, ol 2018 jyly emdeý hattamalary ózgertilgenin atap ótti. Olar eýropalyq jáne amerikalyq onkologtar qaýymdastyǵymen tolyqtai beiimdelgen. Qazir patsientter halyqaralyq standarttarǵa sáikes emdelýde.
«Biz 15 jańa dárini immýnoterapiiaǵa engizdik. Ár preparattyń baǵasy 500 myńnan 3 million teńgege deiin. Bul, árine, memleket úshin úlken salmaq. Biraq memleket emdeýdiń bul túrin tolyqtai qamtidy, bizdiń patsientterdiń ómiri uzarady jáne kóp naýqas aýrýynan aiyǵady», - dep qosty Qaidarova.
Onyń aitýynsha, onkologiia - kúrdeli sala. Árbir onkologtyń deńgeii jyl saiyn joǵarylaidy. Onkolog bolý úshin shamamen 10 jyl qajet. Sondai-aq, qazir aǵylshyn tilin bilýge mindetti.
«Biz 2018 jyly jańa dári-dármekter men jabdyqtarǵa memlekettik biýdjetten qosymsha qarjy alý úshin qaterli isikpen kúresýdiń keshendi josparyn qorǵadyq. Mańǵystaý oblysynda, Pavlodarda jańa onkologiialyq dispanser ashyldy, Óskemende ashý josparda. Elimizdiń barlyq oblys ortalyqtarynda birtindep ashyp jatyrmyz. Sonymen qatar kadrlar daiyndaimyz», – dep qortyndylady spiker.
