QR Eńbek jáne halyqty áleýmettik qorǵaý ministrligi eńbek quqyqtaryn qorǵaýǵa, óndiristik jaraqattanýdy tómendetýge jáne eńbek jaǵdailary ziiandy jumys oryndaryn qysqartýǵa baǵyttalǵan birqatar qujattar daiyndap jatyr. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa májilisinde vedomstvo basshysy Serik Shápkenov málim etti, dep habarlaidy QazAqparat.
Ministr óz sózinde laiyqty eńbek jaǵdailaryn qamtamasyz etý jáne eńbek quqyqtaryn qorǵaý maqsatynda Qazaqstan kásiporyndarynda eńbek zańnamasynyń saqtalýyna turaqty monitoring jáne baqylaý júrgizilip otyratynyn aitty.
«2020 jyly tekserý nátijeleri boiynsha 4,4 myń jumys berýshi 7 myńnan astam talapty buzýshylyqty joidy. 31 myńnan astam jumyskerdiń quqyqtary qorǵaldy, olarǵa jalaqy boiynsha 4,2 mlrd teńgeden astam bereshek tólendi. Sonymen qatar, jalaqy boiynsha bereshek máselesi áli de saqtalýda. Biylǵy 31 qańtardaǵy jaǵdai boiynsha 70 kásiporynda qaryz 837 mln teńgeni qurady. Bankrot nemese ońaltýdaǵy kásiporyndardaǵy bereshek erekshe alańdaýshylyq týǵyzady, onyń úlesi jalpy somanyń 78 paiyzyn qurady», – dedi S. Shápkenov.
Ministr sondai-aq, eńbek qaýipsizdigi men eńbekti qorǵaýdy qamtamasyz etý aiasynda 2,7 myńnan astam kásiporyn halyqaralyq standarttardy engizgenin, 3 myńnan astam óndiristik nysan attestattalǵanyn habarlady. Ishki baqylaýdy 15 myńnan astam óndiristik keńester júzege asyrady.
2019 jylǵy 17 maýsymda Jenevada Eńbekmini Halyqaralyq áleýmettik qamsyzdandyrý qaýymdastyǵymen «Vision Zero» nóldik jaraqattaný tujyrymdamasyn ilgeriletý týraly memorandýmǵa qol qoidy. Respýblikanyń 216 kásiporny osy tujyrymdamaǵa qosyldy.
2020 jyly óndiristegi jazataiym oqiǵalardan zardap shekkenderdiń sany 1 503 adamǵa ósken, al 2019 jylǵy 1 430 jaǵdai bolǵan.
«Ákimdiktermen jáne áleýmettik áriptestermen birlesip, Áleýmettik áriptestik júiesin kúsheitýge baǵyttalǵan keshendi qadamdar iske asyrylýda. 2021 jylǵy 1 qańtardaǵy jaǵdai boiynsha iri jáne orta kásiporyndardyń 97,1 paiyzy jáne shaǵyn kásiporyndardyń 46,8 paiyzy ujymdyq sharttarmen qamtylǵan. Qyzmetkerlerdiń qysqarýyna jol bermeý maqsatynda ákimdikter men óńirlerdiń kásiporyndary arasynda ózara yntymaqtastyq týraly 131 myń memorandým jasaldy. Bul jumysty jandandyrý qajet, oblys ákimderiniń orynbasarlarynan eńbek qatynastaryn retteý máselelerin baqylaýǵa alýdy suraimyn. Eńbek daýlarynyń aldyn alý jáne olardy sheshý jónindegi keshendi jospardy jáne 2019-2023 jyldarǵa arnalǵan óndiristik jaraqattaný men eńbek jaǵdailary ziiandy jumys oryndaryn azaitý jónindegi jol kartasyn iske asyrýdy qamtamasyz etý qajet», – dedi Serik Shápkenov.
Eńbekmininiń basshysy QR Úkimeti men kásipodaqtar men jumys berýshilerdiń respýblikalyq birlestikteri arasyndaǵy jańa Bas kelisimdi kelisý aiaqtalatynyn, ony qabyldaý eńbek qatynastarynyń teńgerimdi damýyn qamtamasyz etýge tiis ekenin aitty.
