Qazaqstanda bilim alatyn Aýǵanstan stýdentteri qaita kirýi úshin aimaqtaǵy jaǵdai ábden turaqtanýy kerek. Bul týraly QR Syrtqy ister ministrligi Halyqaralyq aqparat komiteti tóraǵasynyń orynbasary – baspasóz hatshysy Aibek Smadiiarov aitty, dep habarlaidy QazAqparat.
Qazaqstanda oqyp ketken aýǵanstan azamattarynan elge kelý týraly ótinishter tústi me? Túsken bolsa olardy kirgizý múmkindigi bar ma? Ortalyq kommýnikatsiialar qyzmetinde ótken brifingide BAQ ókilderi QR Syrtqy ister ministriniń orynbasary Aqan Rahmetýllinge osyndai saýal qoidy.
«Qazaqstannyń Syrtqy ister ministrligine Aýǵanstannyń bizde oqyp ketken burynǵy stýdentteri júgingen joq. Eger júginip jatsa, ár adam boiynsha jeke tártipppen sheshim shyǵarylady. Dál qazir ol másele týraly eshteńe aita almaimyz, Iaǵni eshkim júgingen joq», - dedi ministrdiń orynbasary.
Al Aibek Smadiiarovtyń aitýynsha, Qazaqstanda qazir bilim alyp jatqan stýdentterden oqýyn ári qarai jalǵastyrý týraly ótinishter túsip jatqan kórinedi.
«Qazaqstanda qazir oqyp jatqan stýdentterdiń arasynda jazǵy demalys kezinde eline ketkender bar. Olar týraly málimetter túsip jatyr bizge. Oqýlaryn osyndai jalǵastyrǵysy keletinderi bar. Biz bul áseleni baqylaýda ustap otyrmyz. Aýǵanstandaǵy jaǵdai turaqtanǵan kezde bizdiń elshilik mindetti túrde olarǵa tiisti viza beredi. Eki arada áýe nemese basqa kólik qatynasy qalypqa kelgen soń Qazaqstandaǵy oqýlaryn alańsyz jalǵastyra alady», - dedi Aibek Smadiiarov.
