Kórneki sýret: depositphotos.com © URA.RU
Sońǵy kezde bala zorlaý deregi jiilep ketti. Psihiatr dárigerdiń pikirinshe, mundai asa aýyr qylmystyń sebebi kóp. Sondyqtan onymen túrli deńgeide kúresý kerek ekenin aitady, dep habarlaidy Kazinform agenttigi.
Respýblikalyq psihikalyq densaýlyq ǵylymi-praktikalyq ortalyǵynyń bas direktorynyń orynbasary Nábi Esimovtyń aitýynsha, kishkentailar tek pedafilder tarapynan ǵana emes, deni saý adamdar tarapynan da seksýaldy zorlyqqa ushyraýy múmkin.
«Balalarǵa zorlyq kórsetkenderiń ishinde pedafildermen qosa basqa da adamdar bolatynyn atap ótkim keledi. Sebebi, biz olardyń qandai motivte ondai azǵyndyqqa barǵanyn bilmeimiz. Sondyqtan árbir adamdy jeke qarastyryp, jeke zerttep baryp onyń pedafildik aýytqýy bar-joǵyn anyqtaimyz. Jalpy, biz pedafildikti halyqaralyq aýrýlar jiktemesiniń 10-shy qaralýy boiynsha qaraimyz, iaǵni diagnostikalyq kriterii anyqtap beredi: Qumarlyǵy bar naýqas 18 jasqa tolý kerek jáne kem degende bes jas kishi adamǵa qumarlyǵy bolýy kerek. Tek osylai anyqtai alamyz», - deidi ol.
Psihiatrdyń sózinshe, zorlyqqa ushyraǵan balamen mindetti túrde mamandar keshendi jumys júrgizýi tiis.
«Zorlyq-zombylyqqa ushyraǵan balaǵa túbegeili em júrgizý qajet. Eń aldymen, olar psihologtiń kómegine muqtaj. Óz kezeginde psihiatrlar psihoterapiialyq ádistermen ishki jan dúniesindegi negativti syrtqa shyǵarýy kerek. Álbette, ana-analardyń da róli zor», - deidi maman.
Nábi Esimov elde qansha adamǵa pedofil diagnozy qoiylǵanyn atap ótti.
«Bizde pedofil diagnozy qoiylǵan naýqastar bar. Eger olar zorlyq-zombylyq jasaǵan bolsa, olarǵa májbúrlep emdeý protsedýrasy taǵaiyndalady. Qazirgi tańda Qazaqstanda 37 adamǵa pedofil diagnozy qoiylǵan. Olarǵa himiialyq kastratsiia túrinde májbúrlep emdeý sharasy qoldanyldy jáne dinamikalyq baqylaýǵa alyndy», - deidi dáriger.
