Qazaqstanda munaidy esepke alý júiesi 2021 jyly iske qosylady, dep habarlaidy "Ult aqparat" Energetika ministrligine silteme jasap.
Energetika ministrligi Tsifrlyq damý, innovatsiialar jáne aeroǵarysh ónerkásibi ministrligime birlesip, «UAT» AQ bazasynda munai men gaz kondensatyn esepke alýdyń aqparattyq júiesin tolyqqandy rejimde iske qosady. Mehanizm tutynýshyǵa jetkizýge daiyndalǵan ainalymdaǵy shiki munai men gaz kondensatynyń mólsheri týraly derekterdi jinaý, óńdeý, saqtaý jáne paidalaný protsesin avtomattandyrýǵa múmkindik beredi.
«Aqparattyq júie daiyndyqtan, tasymaldaýdan, saqtaýdan, tiep-jóneltýden, ótkizýden, Qazaqstannan tysqary jerlerge ákelýden jáne áketýden bastap munai men gaz kondensatyn esepke alýdyń tiimdi quraly retinde qurylǵan. Sondai-aq bul esepterdi tapsyrý kezinde adami faktor qateleriniń azaiýyna jáne qaǵaz qujat ainalymy úlesiniń qysqarýyna ákeledi.
Munai men gaz kondensatyn esepke alý júiesi munai óndirý, tasymaldaý jáne qaita óńdeý salasynda jumys isteitin kásiporyndardyń qoldanystaǵy aqparattyq júielerimen integratsiialanady. Óndirý, daiyndaý, qaita óńdeý, tasymaldaý, saqtaý, ótkizý, tiep-jóneltý, Qazaqstannan ákelý jáne áketý kólemderi týraly barlyq derekter aqparattyq júiege beriledi. Kompaniialar ornatylǵan esepteý quraldaryn ishki baqylaý retinde nemese basqa maqsattar úshin paidalana alady», delingen habarlamadaú
Ýákiletti organ jedel derekter negizinde memlekettik deńgeide shuǵyl sheshim qabyldaityn, gaz kondensaty munaiynyń ainalymyn boljaityn, materialdyq teńgerimdi avtomatty túrde eseptei alatyn jáne esepke alý aspaptarynan alynǵan derekter negizinde esepter qalyptastyra alady.
Bul rette, naqty aqparat alý úshin barlyq derekter ár uiymnan jeke qabyldanady, al esepter kásiporynnyń qyzmetine bailanysty qalyptasady. Mysaly, munai tasymaldaý uiymdary óndirýshi uiymdardan munaidy qabyldaý, munai óńdeý uiymdaryna jáne eksportqa tapsyrý boiynsha esepterdi beredi.
«Búgingi tańda júie pilottyq rejimde iske qosylǵan jáne oǵan 3 munai tasymaldaýshy uiymy qosyldy: – «QazTransOil», «MunaiTas» jáne «Qazaqstan-Qytai qubyry». «Kaspii qubyr konsortsiýmy» qosylý satysynda tur. Biyl júiege Qazaqstannyń munai óndirisiniń jalpy kóleminiń 60%-yn qamtamasyz etetin birqatar uiymdy qosý josparlanýda. 2021-2022 jyldary MEAJ-ǵa barlyǵy 3 munai óńdeý zaýyty, 16 shaǵyn MÓZ, 4 munai tasymaldaý uiymy jáne 100 jer qoinaýyn paidalanýshy derekter jiberedi», delingen habarlamada.
