2025 jylǵa qarai polietelentereftalat jáne metanol óndiretin zaýyttar iske qosylady. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«Nur Otan» partiiasynyń «Ózgerister joly: Ár azamatqa laiyqty ómir!» sailaýaldy baǵdarlamasy aiasynda Atyraý, Oral jáne Shymkent qalalarynda munai men gazdy tereń óńdeitin 5 zaýytty iske qosý arqyly eksportqa baǵyttalǵan munai-gaz himiia ónimderiniń óndirisin 2019 jylmen salystyrǵanda 9 esege ulǵaitý kózdelge», - dedi óńdeý ónerkásibin damytý jaiynda baiandaǵan ministr.
Onyń atap ótýinshe, búgingi tańda 3 zaýyt salynýda.
«Atap aitsam: Atyraý oblysynda qýaty jylyna 500 myń tonna polipropilen óndiretin zaýyt jáne qýaty 57 mln tekshe metr azot jáne 34 mln tekshe metr qurǵaq syǵylǵan aýa óndiretin zaýyt, Shymkent munai-himiia zaýytynyń shikizaty negizinde qýaty jylyna 81 myń tonna polipropilen jáne 57 myń tonna benzinge arnalǵan oktan arttyrǵysh qospa shyǵaratyn zaýyt», - dedi ol.
Nurlan Noǵaevtyń aitýynsha, budan basqa, 2025 jylǵa qarai 2 áleýetti jobany iske asyrý josparlanǵan. Olar: qýaty jylyna 430 myń tonnany quraityn polietelentereftalat óndirý zaýyty men jyldyq qýaty 130 myń tonna bolatyn metanol óndirý zaýyty.
