Qazaqstan Prezidenti Qasym-Jomart Toqaev muǵalimder men dárigerlerdiń mártebesin kóteretin jańa zańdar qabyldanatynyn málimdedi, dep habarlaidy Sputnik Qazaqstan tilshisi.
Elordada Qazaqstannyń jańadan sailanǵan prezidentin ulyqtaý rásimi ótti. Saltanatty rásimnen keiin Qasym-Jomart Toqaev Qazaqstandy odan ári damytýdyń on baǵytyna toqtaldy. Sonyń altynshy baǵyty – ádiletti áleýmettik saiasat júrgizý.
Memleket basshysy atap ótkendei, bilik adam kapitalyn damytý saiasatyn jalǵastyrmaq.
"Bul baǵytta, eń aldymen, ne isteýimiz qajet? Jappai bilim berýdi qoldaý jáne barlyq turǵynǵa sapaly meditsinalyq qyzmet kórsetý. Biz muǵalimderdiń jáne dárigerlerdiń mártebesin kóteretin jańa zańdar qabyldaimyz. Olardyń quqyǵyn qorǵap, materialdyq jaǵdaiyn jaqsartý úshin tiisti jaǵdai jasaimyz", - dedi Prezident.
Aita ketsek, búgin Nur-Sultandaǵy Táýelsizdik saraiynda Qazaqstan tarihyndaǵy ekinshi prezidentti ulyqtaý rásimi ótti. Qasym-Jomart Toqaev memlekettik tilde ant berip, prezident qyzmetine resmi túrde kiristi.
9 maýsymda ótken prezident sailaýynda Toqaev daýys berýshilerdiń 70,96 protsent daýsyn jinap, jeńiske jetken edi.
