Qazaqstan kásipkerleriniń quqyǵyn qorǵaý jónindegi ýákil Rýstam Júrsinov Facebook arqyly kásipkerlerdiń shaǵymyn jetkizdi, dep habarlaidy "Ult aqparat".
«Maǵan kásipkerlerden kóptegen ótinish túsip jatyr, olardyń aitýynsha monopoliiaǵa qarsy organ olardyń qyzmetine shamadan tys kóp aralasady.
Atap aitqan jón, monopoliiaǵa qarsy vedomstvo áleýmettik mańyzy bar azyq-túlik taýarlarynyń 19 pozitsiiasyna qatysty baǵanyń ósýine bailanysty basa nazar aýdaryp otyr. Baǵanyń kóterilýine qarsy kúreste bólshek saýda jelilerine qatysty qatań sharalar qoldanylady», - deidi ýákil.
Rýstam Júrsinov baǵanyń negizsiz ósýi azamattardyń qaltasyn qaǵyp jatqanyn moiyndaidy. Biraq baǵanyń shamadan tys rettelýi eń qajetti azyq-túliktiń tapshylyǵyn týǵyzýy múmkin degen eskertý aitady.
«Dúken sóreleri 80-jyldardaǵydai bosap qalýy da ǵajap emes. Bulai kete berse, bólshek saýda áleýmettik mańyzy bar azy-túlik satýdan bas tartady. Óitkeni bir jaǵynan olardy satý ekonomikalyq turǵydan múmkin emes bolsa, ekinshi jaǵynan, shekti baǵadan asyp ketkeni úshin saýdager qatań jazalanady», - degen resmi ýákil saýda jelileriniń azyq-túlik taýarlarynyń bólshek saýdasyndaǵy úlesi mardymsyz ekenin eske salady. Sondyqtan baǵany retteý sharalary kútken áserin bermei jatyr dep sanaidy.
«Damyǵan elderde qazirgi zamanǵy formattardyń úlesi (saýda jelisi) barlyq bólshek saýda naryǵynyń orta eseppen 80%-yna jetedi, Reseide bul kórsetkish 69% - ǵa, Belarýste - 61%-ǵa, Frantsiia men Koreiada - 81-ǵa, Avstriiada - 86%-ǵa jetti. Qazaqstanda bul deńgei 31%-ǵa áreń jetedi. Demek, memleket ózi usynǵan shekti baǵalardy saqtaý arqyly baqylanbaityn bólshek saýda úshin básekege qabiletsiz artyqshylyqtar beredi. Men baǵalardy tek naryqtyq ádistermen retteýge bolatynyna senimdimin. Dál osy úshin monopoliiaǵa qarsy organdar bar. Bólshek saýdany ákimshilik jaýapkershilikke tartý durys emes», - dep jazdy ol Facebook paraqshasynda.
Kásipkerlerdiń quqyǵyn qorǵaýshy monopoliiaǵa qarsy komplaens quraldaryn engizýdi usyndy.
«Monopoliiaǵa qarsy komplaenstiń syrtqy aktisin kelise otyryp, kásipkerler monopoliiaǵa qarsy organmen kelisim jasasady. Osylaisha olar «taýar naryǵyndaǵy oiyn erejelerin» belgileidi. Erejeni saqtaǵan kásipkerler jaýapkershilikke tartylmaidy. Al azyq-túliktiń 19 túri boiynsha biz belgili bir ústemeaqyny bekitýdi usynamyz. Bul tasymaldaý, saqtaý jáne t. b. shyǵyndardy óteýge tiis», - dedi Rýstam Júrsinov.
Qazaqstan kásipkerleriniń quqyqtaryn qorǵaý jónindegi ýákil Básekelestikti qorǵaý jáne damytý agenttiginiń tóraǵasy Serik Jumanǵaringe monopoliiaǵa qarsy organnyń bazasynda taldaý ortalyǵyn qurý týraly usynyspen hat joldaǵanyn aitady.
«Ortalyqtyń qyzmeti taýar pozitsiialarynda baǵalyq taldaý júrgizýge jáne naryqta jaǵymsyz kórinisterdiń paida bolý sebepterin anyqtaýǵa baǵyttalatyn bolady. Bul memlekettik organdar tarapynan jazalaý sharalaryn qoldanbai, áleýmettik mańyzy bar azyq-túlik baǵasynyń ósý problemasyn júieli túrde qarastyrýǵa múmkindik beredi. Bul jerde kásipkerler de tutynýshy tárizdi qalyptasqan jaǵdaidyń kepiline ainalǵanyn túsingen jón», - dep túiindedi Rýstam Júrsinov.
