Qazaqstanda mobildi aýdarymdardy jeke jáne kásipkerlik maqsattarǵa bólý máselesi pysyqtalyp jatyr. Bul jaiynda Májilis depýtattarynyń saýalyna QR Qarjy ministri Erulan Jamaýbaevtyń jaýabynda aitylǵan, dep habarlaidy "Ult aqparat".
«Aýdarymdardyń kommertsiialyq maqsattarda keńinen taralýyna bailanysty ministrlik Qazaqstan Respýblikasynyń Ulttyq bankimen, Qazaqstan Respýblikasynyń Qarjy naryǵyn retteý jáne damytý agenttigimen, Qazaqstan qarjygerleriniń qaýymdastyǵymen jáne ekinshi deńgeidegi banktermen birlesip qoldanystaǵy tetikti saqtai otyryp, mobildik aýdarymdardy jeke jáne kásipkerlik maqsattarǵa bólý jónindegi fýnktsionaldy zańnamalyq retteý jáne iske asyrý máselelerin pysyqtaýda», - delingen ministrdiń jaýabynda.
Ministrdiń bergen jaýabyna sáikes, búgingi tańda birqatar usynystar men zańnamalyq bastamalar anyqtaldy.
Atap aitqanda, kásipkerlik qyzmetke arnalǵan jeke shotty paidalaný; olar boiynsha málimetterdi Memlekettik kirister organdaryna berý (Qazaqstan Respýblikasy Salyq kodeksiniń POS-terminaldar boiynsha málimetterdi berý 2 jónindegi qoldanystaǵy normasyna uqsas); «mobildi tólemder» uǵymynyń anyqtamasy»; kásipkerlik qyzmetke arnalmaǵan shottardy paidalana otyryp, eń joǵary yqtimaldyqpen tabys alý belgilerin anyqtaityn táýekelderdi basqarý júiesin ázirleý bastamasy bar.
«Joǵaryda kórsetilgen bastamalar salyqtyń jańa túri bolyp tabylmaidy jáne salyq eseptilikterinde jáne salyqtardy tóleýde málimetterdiń durys jáne tolyq kórsetilýine baǵyttalǵan. Bul rette, boljanyp otyrǵan sharalar jeke tulǵalardyń jeke maqsattardaǵy aýdarymdaryna áser etpeitinin atap ótemiz», - dep jaýap berdi Erulan Jamaýbaev.
