Foto: Aqorda
Qazaqstan Respýblikasy Prezidentiniń ókimine sáikes 1999 jylǵy 8 qarashadaǵy №90 «Qazaqstan Respýblikasynyń memlekettik nagradalarymen nagradtaýǵa usyný jáne olardy tapsyrý tártibi týraly nusqaýlyqty, Qazaqstan Respýblikasynyń memlekettik nagradalaryna arnalǵan qujattardyń úlgilerin jáne memlekettik nagradalar belgileriniń sipattamasyn bekitý týraly» ókimge ózgerister men tolyqtyrýlar engizildi, dep habarlaidy Ult.kz.
Ózgerister nagradtaýǵa kandidattardy qaraý kezinde ashyqtyqty, obektivtilikti jáne ádildikti qamtamasyz etýge baǵyttalǵan. Nusqaýlyqtyń jańa redaktsiiasynda qujattardy resimdeý jáne kandidattardyń eńbegin baǵalaý kriteriilerine qatysty negizgi erejeler naqtylandy.
Atap aitqanda, nagradtaý qaǵazyn resimdeýge qoiylatyn talaptar tolyqtyryldy. Onda mindetti túrde eńbek joly, el men halyq aldyndaǵy naqty eńbekteri, sondai-aq qylmystyq quqyqbuzýshylyqtar týraly málimetter olardyń jasalǵan ýaqytyna qaramastan kórsetiletin bolady. Jekelegen jaǵdailarda ishki ister organdarynan minezdeme talap etiledi.
Kópbalaly analardy nagradtaýǵa qoiylatyn talaptar retke keltirildi. Nagradtaý tek Qazaqstan Respýblikasynyń azamaty bolyp tabylatyn kópbalaly analarǵa beriledi. Nagradtaý qaǵazyn resimdeý kezinde kópbalaly ananyń ózge memleket azamaty bolyp tabylatyn balalary pasporttarynyń kýálandyrylǵan kóshirmeleri jáne fotosýretteri qosa berilýi kerek.
Aita ketý kerek, nusqaýlyqqa sáikes memlekettik nagradalardyń kóshirmelerin (dýblikattaryn) daiyndaý kezinde qymbat baǵaly metaldar qoldanylmaidy.
Memlekettik nagradalarǵa quqyqty qalpyna keltirý múmkindigi ýákiletti organdardyń ótinishi boiynsha, sot aktilerin qosa alǵanda, rastaityn qujattar usynylǵan jaǵdaida qamtamasyz etiledi.
Qabyldanǵan ózgerister nagradtaýǵa usyný rásimin retke keltirýge jáne memlekettik nagradalar institýtyna degen senimdi arttyrýǵa baǵyttalǵan.
