Elimizde memlekettik qyzmetke kirýdegi josyqsyz kedergiler alynyp, al qyzmetten shyǵýdyń tártibi jeńildei túspek. QR Memlekettik qyzmet isteri agenttiginiń tóraǵasy Darhan Jazyqbaev toqtalyp ótti, dep habarlaidy QazAqparat.
«Memleket basshysy qańtardaǵy Májilis otyrysynda sóilegen sózinde sheshýdi talap etetin birqatar máselelerdi atap ótti. Ol kadrlyq áleýettiń tómendigi, tapsyrmany oryndaýdaǵy formalizm, sybailas jemqorlyq, kadrlardyń turaqtamaýy, jappai biýrakratiianyń oryn alýy jáne sheneýnikter men halyqtyń arasyndaǵy bailanystyń tómendigi. Qoǵam memlekettik qyzmetker degende óz isine adal, elge janashyr adamdy kórgisi keledi. Agenttik barlyq memlekettik qyzmetti túbegeili retke keltirý boiynsha aýqymdy jumys atqarýy tiis», - dedi Darhan Jazyqbaev agenttiginiń keńeitilgen alqa otyrysynda.
Onyń aitýynsha, alda kadrlardy irikteý júiesin jetildirý jáne memlekettik qyzmetke kirý úshin artyq tosqaýyldardy alyp tastaý mindeti tur.
«Osyǵan bailanysty irikteý júiesi jeńildetilip, memlekettik qyzmet barlyǵyna qoljetimdi bolady. Buǵan qosa, memlekettik qyzmetten «shyǵý» tártibi jeńildetiledi. Qazirgi ýaqytta jumystan bosatý úshin qyzmetshi qatarynan 2 jyl qanaǵattanarlyqsyz dep baǵalanýy qajet ekenin bilesizder. Qyzmetin baǵalaý qorytyndylary boiynsha jumysyn tómen atqarǵan dep sanalatyn qyzmetkerlerdi jumystan bosatýǵa tezirek múmkindik beretin erejeler qalyptastyrýymyz qajet dep sanaimyn», - deidi ol.
Odan bólek, agenttik basshysy memlekettik qyzmetke qabyldaý men qyzmettik saty boiynsha ósýde meritokratiia qaǵidatyna súiený kerektigin aitty.
«Elimizde kóptegen talanttardyń bary eshkimge qupiia emes. Ártúrli sebepterge bailanysty, kóbinese olar beimálim qalyp jatady. Bizdiń mindet – elge qyzmet etkisi keletin, ynta-talaby bar azamattarǵa memlekettik qyzmette jumys atqarýǵa múmkindik týdyrý. Bul úshin Prezidenttik jastar kadr rezervine irikteý júrgizý jumystary jalǵasatyn bolady. Sondai-aq, aldaǵy ýaqytta, jastar men memlekettik qyzmetshiler arasynan talanttardy anyqtaý úshin túrli hakatondar men taqyryptar boiynsha konkýrstar ótkizý máselesi pysyqtalady», - dedi Jazyqbaev.
