QR Bilim jáne ǵylym ministrligi mektepterde tiptik oqý josparlaryn jeńildetý baǵytynda jumystarǵa kiristi, dep habarlaidy QazAqparat tilshisi.
«Sarapshylardyń kópshiligi bizdiń balalardyń mekteptegi júktemesine aýyr ekenin rastap otyr. Bul máselege Memleket basshysy nazar aýdarǵan edi. TMD jáne EYDU elderimen salystyrsaq, bizdiń tiptik oqý josparlarymyzdyń artyq júktemesi bar. Qazirgi kezde ministrlik tiisti jumysty iske asyryp jatyr, osy oraida jumys toby quryldy. Bul baǵytta sarapshylarmen, ádiskerlermen jáne pedagogtyq qoǵamdastyqpen konsýltatsiialar júrip jatyr», - dedi Bilim jáne ǵylym vitse-ministri Ashat Aimaǵambetov Ortalyq kommýnikatsiialar qyzmetinde ótken baspasóz máslihatynda.
Bul turǵyda ol mektep baǵdarlamalaryn jeńildetý aýqymdy taldaý jumystaryn qajet etip otyrǵanyn sóz etti.
«Oqý baǵdarlamasyn jai ǵana qysqarta salý qisynsyz áreket. Bul rette bilim salasy aldynda turǵan maqsattardy eskerý kerek, sonymen qatar qoǵam úshin qajet mektep túlegine qoiylatyn talaptar pysyqtalýy tiis. Sondyqtan osy ózekti máselelerdi eskere otyryp, sheshim qabyldaý qajet. Sáikesinshe, bul baǵytta bilikti sarapshylar óz baǵasyn berýi oryndy bolar edi», - dep túidi ol.
Budan buryn habarlanǵandai, biyl aqpan aiynda Májiliste orta bilim máselelerine arnalǵan otyrysta Bekbolat Tileýhan balasy teńerteńnen keshke deiin mektepte ekenin aityp, narazylyǵyn bildirgen edi.
