Májilis depýtaty, Qazaqstan mashina jasaýshylar odaǵynyń tóraǵasy Meiram Pishembaev mashina jasaý salasyn damtý josparymen bólisti, dep habarlaidy QazAqparat.
«Mashina jasaý salasynyń damýy – ol kez kelgen el ekonomikasynyń kórsetkishi. Germaniia ekonomikasynda bul salaǵa 40 paiyzǵa deiin, Reseide 27 paiyzǵa deiin tiesili. Ókinishke qarai, bizde mashina jasaý bul deńgeige jete qoiǵan joq. Alaida sońǵy jyldary osy baǵytta qarqyndy damý bar, sáikesinshe, import qysqaryp, kásiporyndar sany artyp keledi. Eń bastysy – eli ishinde jáne shetelde ónimge suranys bar. Kórshi elder ózderiniń mashina jasaý salasyn belsendi túrde damytýyna bailanysty bizge olardan qalys qalýǵa bolmaidy», - dedi M. Pishembaev Úkimet úiinde ótken baspasóz máslihatynda.
Onyń sózine qaraǵanda, Qazaqstanda salany damytý úshin qajetti áleýet pen baza bar.
Mashina jasaý ónimi kólemin arttyrý, ishki tutyný kólemin joǵarylatý, importqa táýeldilikti tómendetý, sondai-aq eksportqa negizdelgen ónimdi kóbeitý úshin 2019-2024 jyldarǵa arnalǵan Mashina jasaýdy damytýdyń jol kartasy ázirlendi.
«Atalǵan qujat úsh basymdyqqa negizdelgen. Birinshisi - ónerkásiptik saiasat týraly zańdy qabyldaý, ekinshisi – QR Indýstriia jáne infraqurylymdyq damý ministrligi janynda Qazaqstannyń ónerkásiptik damýy qoryn qurý. Úshinshisi – kásiporyndar úshin salyqtyq jeńildikterdi engizý usynylýda. Bul turǵyda qoldanystaǵy óndiris qýattaryn jańǵyrtý men otandyq kásiporyndardyń eksporttyq áleýetin arttyrýǵa ekpin qoiylady», - dedi Qazaqstan mashina jasaýshylar odaǵynyń tóraǵasy.
