Qazaq ǵylymi-zertteý veterinarlyq institýtynyń bas direktory Ahmetjan Sultanov malǵa qajetti biopreparattar men vaktsinalardyń sapasyn baqylaityn arnaiy mekeme qurý týraly usynys bildirdi, dep habarlaidy QazAqparat.
«Jalpy Qazaqstanda óndiriletin jáne shetelden ákelinetin veterinarlyq preparattardyń sapasyn baqylaý kerek. Osy maqsatta respýblikada memlekettik ǵylymi baqylaý mekemesin qurý kerek dep esepteimiz. Malǵa qoldanylatyn sapasyz biopreparattardyń mysalyn bizdiń institýttyń 2016-2017 jyldary júrgizgen zertteý qorytyndylarynan kórýge bolady. Máselen, oqyra, qarasanǵa qarsy Norvegiia, Resei, Úndistan, Ońtústik Koreia, Chehiia, Qazaqstanda jasalǵan vaktsinanyń normativti-tehnikalyq qujattaryna sipattama jasap kórgen edik. Zertteý barysynda oqyraǵa qarsy vaktsinalardyń 10 seriiasynyń úsheýi ǵana standartqa sáikes bolyp shyqty», - dedi Ahmetjan Sultanov Parlament Májilisinde agrarlyq ǵylymdy, bilim jáne óndiristi integratsiialaý máseleleri boiynsha otyrysta.
Institýt direktorynyń aitýynsha, malǵa qajetti diagnostikalyq jáne emdeý, aldyn alý sharalaryna arnalǵan otandyq preparattarynyń sapasy tómendep ketken. Artynsha importtyq biologiialyq preparattarǵa degen suranys artqan.
«Malǵa diagnostikalyq zertteý jumystaryn júrgizý úshin respýblikaǵa 500 mln teńgeniń biopreparattary shet elderden kirgiziledi. Al otandyq óndirýshiler bul biopreparattardyń 300 mln teńgege jýyq qajettigin ótep otyr. Vaktsinalarda da jaǵdai osy. Bul baǵytta shetelden 2,5 mlrd teńgeniń vaktsinalyq preparattary jetkizilse, óz elimizde otandyq óndirýshiler 500 mln teńgeniń ǵana vaktsinasyn usyna alady. Iaǵni osy qajettiliktiń 16 paiyzyn otandyq óndirýshiler jasap shyǵarsa, 84 paiyzyn sheteldik tasymaldaýshylar ákeledi», - dedi ol.
Ahmetjan Sultanov eldegi otandyq biopreparattarmen ishki qajettilikti jabýǵa múmkindik baryn aitady.
«Oqý ortalyqtaryndaǵy tar sheńberdegi mamandyqtar men zamanǵa sai qurylǵylardyń kómegimen ishki qajettilikti qanaǵattandyrýǵa bolady. Qazaqstanda biotehnologiialyq profilder boiynsha mamandar barshylyq. Olar otandyq biologiialyq salany jandandyryp, qajetti biopreparattardyń óndirisin retke keltire alady», - dedi ol.
