Elimizde iskerlik bailanys nómirlerdi izdeý men ornatýǵa arnalǵan LinkedIn áleýmettik jelisiniń jumysy toqtatyldy, dep habarlaidy "Ult aqparat".
Jeli qoldanýshylary onyń kesheden (26 shilde) bastap jumys istemei turǵany týraly shaǵym túsirip jatyr.
QR Aqparat jáne qoǵamdyq damý ministrligi LinkedIn áleýmettik jelisi jumysynyń toqtatylýyn internet resýrsy tarapynan oryn alǵan tártip buzýshylyqpen túsindirdi.
«LinkedIn internet resýrsyna monitoring júrgizý barysynda birneshe zańbuzýshylyq anyqtaldy. Atap aitqanda, internet-kazinony jarnamalaý jáne bireýlerdiń atynan jalǵan akkaýnttar ashý. Atalǵan zańbuzýshylyqtar Qazaqstan Respýblikasynyń zańnamalyq talaptary men qatar LinkedIn internet resýrsynyń ishki erejelerine de qaishy keledi», - delingen atalǵan vedomstvonyń baspasóz habarlamasynda.
Ministrliktiń málimetinshe, LinkedIn jelisin qoldanýshylarǵa arnalǵan kelisimde internet resýrsta jariialanatyn aqparat zańdy ári ras bolýy tiis jáne ol úshinshi jaqtyń quqyǵyna qaishy kelmeýi kerek.
Sondai-aq, atalǵan áleýmettik jeli erejesine sáikes, qoldanýshylardy shatastyryp, jalǵan aqparat taratýǵa jáne qumar oiyndardy jarnamalaýǵa tyiym salynady.
«Osy oraida ministrlik QR «Bailanys» týraly» zańynyń 41-1 babynyń 3-1 tarmaǵyna sáikes, zańbuzýshylyqtyń oryn alǵanyn anyqtap, LinkedIn internet resýrsynyń ákimshiligine atalǵan olqylyqty joiý týraly habarlama jiberdi. Ókinishke qarai, jeli ákimshiligi tarapynan zańbuzýshylyq áli kúnge deiin joiylǵan joq» - delingen aqparatta.
Aqparat jáne qoǵamdyq damý ministrligi óz kezeginde LinkedIn jelisin qoldanýdaǵy zańbuzýshylyq joiylyp, qalpyna kelgen jaǵdaida onyń jumysy elimizde jalǵasa beretinin alǵa tartty.
LinkedIn – iskerlik bailanys nómirlerin izdeý men ornatýǵa arnalǵan áleýmettik jeli. Internet resýrsta 70 mln adam tirkelgen, álemniń 200 elinen biznestiń 150 salasy usynylǵan. Sait álemniń 24 tilinde qoljetimdi.
