Qazaqstanda lańkestikke qarsy 7 zań ázirlenedi. Búgin QR Parlamenti palatalarynyń birlesken otyrysynda sóz sóilegen Elbasy Nursultan Nazarbaev osylai dedi. Bul týraly Ult.kz tilshisi QazAqparatqa silteme jasap habarlaidy.
«El qaýipsizdigin zańnamalyq negizde nyǵaitý birinshi josparǵa ainaldy. Qazaqstan jáne is júzinde álemniń barlyq elderi lańkestik qaterimen betpe-bet kelip otyr. Aqtóbedegi jáne Almatydaǵy lańkestik shabýyldardyń saldarynan Ulttyq gvardiiashylar, politseiler, beikúná azamattar qaza tapty. Mundai jaǵdaida memleket eshteńege qaramastan óziniń institýtsionaldyǵyn nyǵaitýy tiis. Qoǵamdaǵy turaqsyzdyqty qalaityn jáne sol oqiǵalardy paidakúnemdik úshin paidalanýǵa umtylatyn keibir ishki jáne syrtqy kúshter toitarys jasaý qajet», - dep atap ótti Elbasy.
Osy rette Memleket basshysy depýtattardyń nazaryn lańkestikke qarsy zańdy túrde quqyq qorǵaý sharalaryn qabyldaý qajettigine aýdardy.
«Meniń tapsyrmammen ekstremizmge, lańkestikke qarsy turý, qarsy barlaý qyzmeti, daktioskopiialyq jáne genomdyq tirkeý, eldiń aqparatyq qaýipsizdigin nyǵaitýdy maquldaý máseleleri boiynsha 7 zań jobasy ázirlenip, Májiliske engiziledi. Biz bul zańdardy ázirleimiz jáne elimizdiń qaýipsizdigi úshin qabyldaýǵa depýtattarǵa usynamyz», - dedi Prezident.
N.Nazarbaev adamdar tynysh jumys isteýi úshin jáne qoǵamdaǵy turaqtylyqty, qaýipsizdikti saqtaý eń mańyzdy jait ekendigin basa aitty.
«Depýtattardan bul usynystarǵa baiyppen qaraýdy jáne bul máselelerdi jyl sońyna deiin sheshýdi ótinemin», - dedi Memleket basshysy.
.jpeg)