Qazaqstanda qyzylshaǵa shaldyqqan eresekterdiń 55 paiyzdan astamyn 20-29 jas aralyǵyndaǵy azamattar quraidy. Bul týraly Úkimet otyrysynda QR Densaýlyq saqtaý ministriniń mindetin atqarýshy Lázzat Aqtaeva aitty, dep habarlaidy "Ult aqparat".
«2020 jyldyń bes aiynda 2019 jyldyń osyndai kezeńimen salystyrǵanda qyzylshamen syrqattanýshylyqtyń 2,8 ese tómendeýine qol jetkizildi. Bul maqsatta 9-10 ailyq balalarǵa qosymsha vaktsinatsiia júrgizildi. 260 myńnan astam bala egildi. Bul, osy jas tobyndaǵy syrqattanýshylyqty 2,5 ese tómendetýge múmkindik berdi. Budan basqa, aýyrǵan eresekter arasynda 55 paiyzdan astamy 20-29 jas aralyǵyndaǵy top ekenin eskere otyryp, osy jas tobyna qyzylshaǵa qarsy qosymsha vaktsinatsiia júrgizildi, 1 759 459 adam egildi», - dedi LázzatAqtaeva.
Onyń atap ótýinshe, elimizde meningitke shaldyǵý azaidy.
«Qazaqstan Respýblikasynda meningokokk infektsiiasymen syrqattanýshylyqtyń ortasha kóp jyldyq deńgeiiniń kórsetkishi 100 myń turǵynǵa shaqqanda 2,1-di quraidy. Bul rette, qazirgi ýaqytta Qazaqstanda syrqattanýshylyq deńgeii 100 myń turǵynǵa shaqqanda 0,15-ti qurap otyr. Bul shekti deńgeiden 14 ese tómen. Jyldyń ótken kezeńinde syrqattanýshylyq ótken jyldyń osyndai kezeńimen salystyrǵanda sol deńgeide saqtalyp otyr. Sonymen birge Shymkent qalasynda aýrý sanynyń 2-den 6 jaǵdaiǵa deiin ulǵaiǵany baiqalady», - dedi ol.
