Qysta Qazaqstanda et baǵasy kúrt óse me? Bul suraqqa Aýyl sharýashylyǵy ministriniń keńesshisi Tóleýtai Raqymbekov jaýap berdi, dep habarlaidy QazAqparat.
«Meniń oiymsha, baǵa eleýli túrde sharyqtamaidy. Alaida ettiń quny ósýi múmkin ekenin áleýmettik jelide jazǵan bolatynmyn, iaǵni Mańǵystaý jáne Qyzylorda oblystarynda mal shyǵyny bolǵanda. Osy oraida maldyń qyrylýyna qatysty toqtalsam, jaǵdai dúrbeleń jasaýǵa tyrysqan keibir adamdar aitqandai úreili emes. Jeńil avtoritetti qýǵandar Qazaqstanda úsh mln bas mal qyrylatynyn jazǵan edi», - dedi T. Raqymbekov.
Onyń aitýynsha, 2017 jyly mal azyǵyn daiarlaý kartasy ázirlengen kezde jyl saiyn mal azyǵy daqyldarynyń tapshylyǵy únemi Mańǵystaý, Qyzylorda, Túrkistan oblystarynda jáne Shyǵys Qazaqstan oblysyndaǵy Semei óńirinde baiqalyp otyrǵany kórsetilgen.
«Bul jaiynda osyǵan deiin belgili boldy. Osy óńirlerde turǵyndar mal sharýashylyǵymen ainalysqysy kelse, jem-shópti qosymsha óndirýge mán berýi kerek edi», - dedi ministrdiń keńesshisi.
«Mańǵystaý oblysynda 28 myń iri qara mal basy bar, elimiz boiynsha 7 mln. Bul qalai áser etedi? Árine, problema bar. Biyl mal sharýashylyǵy men ósimdik sharýashylyǵy úshin kúrdeli boldy. Qýańshylyq bolatynyn aitqan edim, osy oraida maldyń ólim-jitimi múmkin boldy. Biraq ol jutqa ákelmeidi. Adamdar osy ahýalǵa áreket etip, maldy soiyp, etke ótkizýi yqtimal. Naryq zańdylyǵy boiynsha bastapqyda ettiń baǵasy tómendeidi de, keiin baǵa ósýi múmkin edi. Men bul jaiynda jazǵan edim, eselep qymbattamaidy. Sondyqtan kúrt qymbattaidy dep oilamaimyn», - dedi Tóleýtai Raqymbekov.
