2019 jylǵy 7 qyrkúiekten bastap Qazaqstanda kúzgi-qysqy ańshylyq maýsymy ashylady jáne ań-qustyń túrine bailanysty 2020 jyldyń 15 aqpanyna deiin sozylady.
Bul jaiynda QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet Facebook-tegi paraqshasynda jazdy, dep habarlaidy "Ult aqparat".
Onyń dereginshe, ań aýlaýdyń nysanyna 34 sútqorektiniń jáne 59 qustyń túri jatady. Ańshylyq respýblikadaǵy 701 ańshylyq sharýashylyqta ótedi. Qazaqstan Respýblikasy aýmaǵyndaǵy ańshylyq merzimi Ań aýlaý qaǵidalary týraly QR Aýyl sharýashylyǵy ministrligi bekitken 2015 jylǵy 27 aqpandaǵy № 18-03/157 buiryqqa sáikes ótkiziledi.
Qyrkúiektiń alǵashqy senbisinen bastap ańshylyq janýarlardyń kelesi túrine ruqsat etiledi:
- maimaqqaz, qaz, qarashaqaz, úirek, qasqaldaq - 7 qyrkúiekten bastap 30 qarashaǵa deiin soltústik óńirler boiynsha, 15 jeltoqsanǵa deiin ońtústik óńirler boiynsha;
- shil (aqqur, týndralyq, sur, dala shili, saqaldy shil), shil -7 qyrkúiekten 15 qarashaǵa deiin;
- qur – 7 qyrkúiekten 30 qarashaǵa deiin soltústik aimaqtar boiynsha, 15 jeltoqsanǵa deiin ońtústik aimaqtar boiynsha;
- qońyr aiý (tian-shan aiýynan basqa) – 7 qyrkúiekten senbisinen 30 qarashaǵa deiin;
- borsyq – 7 qyrkúiekten bastap 31 jeltoqsanǵa deiin;
- maral, askaniia buǵysy, qaban, qudyr, bulan – 7 qyrkúiekten 31 jeltoqsanǵa deiin;
- sibir taý eshkisi – 7 qyrkúiekten bastap 31 jeltoqsanǵa deiin.
«Orman sharýashylyǵy jáne janýarlar dúniesi komitetiniń 2016 jylǵy 24 qarashadaǵy № 265 buiryǵy boiynsha kásipshilik ań aýlaýdan basqa, bir ańshyǵa shaqqanda jabaiy qus pen terisi baǵaly ańnyń bir túrin alyp qoiýdyń táýliktik normasyn bes daraqqa deiin shekteý týraly normasy bekitildi», - dep jazdy ol.
