Qazaqstanda kúzgi áskerge shaqyrý naýqany bastalady, dep habarlaidy "Ult aqparat" Qorǵanys ministrligine silteme jasap.
Apta basynda ótken apparattyq keńeste qorǵanys vedomstvosynyń basshysy, general-leitenant Nurlan Ermekbaev ministrliktegi kadrlyq ózgerister týraly habarlap, QR Qorǵanys ministrligi Qarý-jaraqty baqylaý jáne inspektsiialardy qamtamasyz etý ortalyǵynyń bastyǵy bolyp taǵaiyndalǵan polkovnik Ádil Bekovty tanystyrdy.
Osyǵan deiin Aýmaqtyq qorǵanys departamenti bastyǵynyń mindetin atqarǵan polkovnik Rizat Qolpashev jáne RHB qorǵanys jáne ekologiialyq qaýipsizdik departamenti bastyǵynyń laýazymyn atqarǵan podpolkovnik Erjan Qulmaǵambetov osy qyzmetterge bekitildi.
Keńes barysynda QR Prezidenti – QR Qarýly Kúshteriniń Joǵarǵy Bas Qolbasshysy tapsyrmalaryn oryndaý maqsatynda sybailas jemqorlyqqa qarsy kúres máseleleri qaraldy.
«Sybailas jemqorlyqqa bailanysty quqyq buzýshylyqtarǵa jol bermeý aiasynda barlyq tártip buzýshylardyń tikelei basshylary áskeri ataqtary men burynǵy eńbekterine qaramastan jaýapqa tartylady. Halyqtyń áskerge degen senimi men eldi qorǵaýǵa degen riiasyz qabiletine nuqsan keltirmeý úshin Qarýly Kúshter qatary zańbuzýshylyqtan taza bolýy kerek», - dedi Nurlan Ermekbaev.
Qazirgi tańda Qarýly Kúshterde sybailas jemqorlyq quqyq buzýshylyqtar boiynsha statistikanyń ósýi baiqalady. Bul osy saladaǵy qylmystyń ósýine ǵana bailanysty emes, sondai-aq, anyqtaý protsesine bailanysty kózqarastyń ózgerýine qatysty bolyp otyr.
Aqpan aiynda qol qoiylǵan memorandým negizinde ýákiletti organmen aqparat almasý júzege asyrylady. Jańa tásilderdi qoldana otyryp, aldyn alý sharalaryn qabyldap, osy baǵyttaǵy taldamalyq jumysty kúsheitýge basa nazar aýdarylady.
Apparattyq keńes barysynda ásker túrleriniń bas qolbasshylary, ásker tekteri men óńirlik qolbasshylyqtardyń qolbasshylary QR Qarýly Kúshteriniń jaýyngerlik ázirliginiń jai-kúii týraly jedel aqparat berdi.
Sondai-aq, Qarýly kúshterde qyrkúiek-jeltoqsan ailary aralyǵynda azamattardy kúzgi merzimdi áskeri qyzmetke shaqyrý jumystaryn júrgizý josparlanýda.
Ásker qataryna jańadan qabyldanǵandarmen jumys isteitin laýazymdy adamdardan turatyn ákimshilik bólimshelerdegi oqý protsesin joǵary deńgeide qamtamasyz etý úshin qabiletti, daiarlanǵan ofitserler men kelisimshart boiynsha serjanttar taǵaiyndalýy tiis.
Azamattardy merzimdi qyzmetke shaqyrý jónindegi barlyq is-sharalar sanitarlyq-epidemiologiialyq jaǵdaidy eskere otyryp uiymdastyrylmaq.
Ministr jas býyndy shaqyrý bastalǵanǵa deiin kazarmalyq-turǵyn úi qoryn, monsha, kir jýý kombinattaryn, ashanalar men oqý-materialdyq bazany qalypqa keltirýdi tapsyrdy.
Áskeri qalashyqtarǵa jaǵdai jasaý, áskeri qyzmetshilerdiń ómiri men turmysyn uiymdastyrý, kazarmalyq qordy jóndeý syndy áleýmettik máselelerdi sheshý Qorǵanys ministriniń erekshe baqylaýynda.
Osyǵan bailanysty qorǵanys vedomstvosynyń basshysy Qaraǵandy qalasynyń áskeri bólimderiniń birinde sarbazdar ashanasyn jóndeý merzimin saqtamaǵany úshin Áskerlerdi páterlerge ornalastyrý bas basqarmasynyń bastyǵyn qatań synǵa aldy. Másele qyzmet kórsetýdiń sýbektisimen shartty buzý protsesinde bolyp otyr. Nurlan Ermekbaev ashanany jóndeý máselesin qysqa merzimde sheshýdi talap etti.
Ótken aptada Qarýly Kúshter qataryn kásibi kadrlarmen tolyqtyrý máselesin jalǵastyrý úshin Qazaqstan Respýblikasy men Resei Federatsiiasy áskeri oqý oryndaryna irikteý júrgizildi.
Buqaralyq aqparat quraldarynda Aqtóbe qalasynyń áýejaiy mańyndaǵy aýdan turǵyndarynan tikushaqtardyń eldi mekenderge jaqyn jerden ushatyndyǵy týraly shaǵymy jariialandy.
Mamandar júrgizgen taldaý boiynsha baǵyttar zańnama talaptaryna sáikes ázirlengenin jáne áýejai janynda qalatynyn, sonymen qatar, ózgertilmeitindigin kórsetti. Shekti biiktikterde ushýlardy oryndaý qaladan 70-80 kilometr qashyqtyqta ornalasqan aimaqtarda júzege asyrylady.
Aita ketý kerek, onda eldi mekender joq, qurylystar azamattyq aviatsiia komitetiniń ruqsatynsyz jáne kelisiminsiz salynǵan.
