Sinoptikter Qazaqstanda 1-3 tamyz kúnderi bolatyn aýa raiyna boljam jasady, dep habarlaidy "Ult aqparat" «Qazgidromet» RMK-ǵa silteme jasap.
«Taiaý kúnderde respýblikadaǵy aýa raiy ortalyǵy Ekaterinbýrgke týra keletin tsiklon yqpal etedi. Soǵan bailanysty Qazaqstan aýmaǵynyń basym bóliginde aýa raiy qubylmaly bolady. Jańbyr jaýady, soltústik jáne batys óńirlerde ol kúsheiýi múmkin. Kúndizgi aýa temperatýrasy tómendep, 15…25°S ainalasynda bolady», - delingen habarlamada.
Sinoptikterdiń aitýynsha, kei jerlerde daýyl turyp, burshaq jaýýy múmkin. Tek respýblikanyń ońtústiginde jaýyn-shashynsyz ystyq aýa raiy ózgermeidi. Bul óńirlerde aýa temperatýrasy 32…40°S ainalasynda bolady.
