Qazaqstan Respýblikasynyń Densaýlyq saqtaý ministrligi ainalymda "úndilik" shtammnyń bolý yqtimaldylyǵyn anyqtady, dep habarlaidy "Ult aqparat".
Nur-Sultan qalasynda koronavirýstyq infektsiiamen syrqattanýshylyq deńgeiiniń kúrt ósýine bailanysty Densaýlyq saqtaý ministrligi KVI juqtyrǵan naýqastardan alynǵan oń zerthanalyq úlgilerdiń PTR skriningin ótkizdi. Skrining nátijeleri boiynsha "Delta" shtammyna ("úndilik" shtamm) tán mýtatsiiaǵa kúdikti jaǵdai anyqtaldy.
Mýtatsiianyń bolýyn jáne onyń "Delta" shtammyna jatatyndyǵyn túpkilikti rastaý DNQ úlgilerin tolyq genomdyq sekvenirleý aiaqtalǵannan keiin belgili bolady.
"Densaýlyq saqtaý ministrligi árbir qazaqstandyqty óz densaýlyǵy men jaqyndarynyń ómirine asa saqtyqpen, jaýapkershilikpen qaraýdy suraidy. Infektsiiadan qorǵaný men aýrýhanaǵa jatýdan aman qalýdyń birden bir joly COVID-19 virýsyna qarsy vaktsinanyń tolyq kýrsyn alý. KVI-ge qarsy ekpe alýǵa qarsy kórsetilimderi joq árbir azamatqa qysqa merzimde vaktsinalanýǵa keńes beremiz", dedi ministrlik ókilderi.
Sońǵy zertteýler kórsetkendei, koronavirýstyń "Úndilik" shtammy aýrýhanaǵa jatqyzý men ólim-jitimniń joǵary yqtimaldyǵymen bailanysty.
"Delta" koronavirýs shtammy asa kontagiozdy jáne anyqtalǵan shtammdarǵa qaraǵanda juqpalylyǵy 60%-ke joǵary, qazirgi ainalymdaǵy shtammdar 1 adamnan orta eseppen 3-4 adamǵa taralatyn bolsa, bul shtamm 5-6 adamǵa birden juǵady jáne 7 kúnge sozylatyn qysqa inkýbatsiialyq kezeńmen sipattalady. Sonymen qatar, indetti juqtyrǵandar býyndar men ishtiń qatty aýyrsynýyn sezinedi, júrek ainyp, loqsidy, aýrý saldarynan adam sańyraý bolyp qalýy ábden múmkin jáne aiaqtardyń mikrotrombozyna ákeledi" - delingen ministrlik habarlamasynda.
Dúniejúzilik densaýlyq saqtaý uiymynyń 2021 jylǵy 20 maýsymdaǵy málimetteri boiynsha SARS-CoV-2 «Delta shtamm» álemniń 174 elinde anyqtalǵan.
