Qazaqstanda koronavirýsqa qarsy taǵy bir vaktsina klinikalyq synaqqa daiyn boldy.
Bul týraly Biologiialyq qaýipsizdik máseleleri ǵylymi-zertteý institýty bas direktorynyń orynbasary Erǵali Ábdiraiymov aitty, dep habarlaidy QazAqparat.
Densaýlyq saqtaý ministri onlain dáris barysynda ol QazVac vaktsinasynan basqa taǵy 5 vaktsinanyń ázirlenip jatqanyn aitty.
«Koronavirýsqa qarsy ol vaktsinadan (QazVac) bólek túrli platformalarda taǵy 5 vaktsina ázirlep jatyrmyz. Olardyń ishinde ekinshi sýbbiregei vaktsina da bar. Ol daiyn boldy jáne janýarlarǵa klinikaǵa deiin zertteýden ótti. Taiaý ýaqytta Densaýlyq saqtaý ministrliginen klinikalyq zertteýdiń birinshi satysynan ruqsat alamyz dep kútip otyrmyz», - dedi Erǵali Ábdiraiymov.
Sonymen qatar direktordyń orynbasary QazVac vaktsinasyna qatysty pikirin de bildirdi.
«Qazaqstandyq vaktsina – bul otandyq ázirleme. Biologiialyq qaýipsizdik máseleleri ǵylymi-zertteý institýty 60 jyldan astam ýaqyt boiy jumys istep turǵanyn bilesizder. Osy ýaqyttyń ishinde túrli 70-ke jýyq preparat ázirlendi. Olardyń 60 paiyzdan astamy qoldanysqa is júzinde engizilip otyr. Elimizde alǵash koronavirýs jaǵdaiy tirkelgende Prezident otandyq vaktsina ázirleýge tapsyrma bergen bolatyn. Biz sol tapsyrmany oryndaýǵa kiristik. Qazir vaktsinany jedel shyǵaryp jatyrmyz. Alǵashqy toptamasy jiberildi, ekinshisi de daiyn bolyp qaldy. «SQ Farmatsiiamen» aradaǵy kelisimshartqa sáikes, jyldyń sońyna deiin vaktsinalardy bizge belgilep bergen habtarǵa jetkizip otyramyz», - dedi ol.
