18 shildede Qazaqstanda 5317 adamnyń analizinen koronavirýs anyqtaldy. Densaýlyq saqtaý ministrliginiń málimetinshe, eki kún buryn 26 adamǵa koronavirýs pnevmoniiasy diagnozy qoiylǵan.
Keiingi birneshe aptada buryn-sońdy bolmaǵan koronavirýs kórsetkishi tirkelip jatyr. Qazir "jasyl aimaqta" birde-bir oblys ne qala qalmady. Túrkistan, Jambyl jáne Shyǵys Qazaqstan oblysy ǵana "sary aimaqta". Qalǵany – "qyzyl aimaqta".
Ótken táýlikte Nur-Sultanda 1367 adamnan koronavirýs anyqtaldy. Almatyda – 798, Qaraǵandy oblysynda – 689, Atyraý oblysynda – 293, Shymkentte – 470, Batys Qazaqstan oblysynda – 204, Aqmola oblysynda – 178, Mańǵystaý oblysynda – 203, Pavlodar oblysynda – 170, Aqtóbe oblysynda – 159, Almaty oblysynda – 126, Qostanai oblysynda – 126, Qyzylorda oblysynda – 127, Mańǵystaý oblysynda – 203, Pavlodar oblysynda – 170, Túrkistan oblysynda 176 naýqas tirkeldi. Qalǵan oblystarda anyqtalǵan naýqastar júzge jetpeidi: Soltústik Qazaqstan oblysynda – 91, Shyǵys Qazaqstan oblysynda – 87, Jambyl oblysynda 53 naýqas anyqtaldy.
14 shildeden beri kún saiyn 5 myńnan astam naýqas tirkelip keledi. Indet bastalǵaly aýrýǵa shaldyqqandar 494 222-ge jetip otyr. Bul virýs juqtyrǵany PTR testimen rastalǵandar ǵana. Budan bólek PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 58 myńnan astam adam shaldyqqan.
2020 jyldyń naýryz aiynan beri koronavirýs testi oń shyqqandar arasynda 4997 adam qaitys bolǵan. 17 shildede koronavirýs 41 adamnyń ólimine sebep boldy. 7 adam koronavirýs pnevmoniiasynan qaitys boldy.
19 shildedegi málimet boiynsha, 58 887 adam koronavirýs infektsiiasynan (–57 269 + jáne 1618 KVI-) emdelip jatyr. Olardyń ishinde 19 005 patsient - statsionarda, 39 882 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1047 adamnyń jaǵdaiy aýyr,
• 230 patsienttiń jaǵdaiy óte aýyr,
• 144 naýqas ÓJJ apparatynda jatyr.
Indettiń kúrt órshýin "delta" variantynyń taraýymen bailanystyrady. Koronavirýstyń bul varianty Qazaqstanda maýsymynyń sońynda tirkelgen. Tez juǵatyn jáne kádimgi túrinen áldeqaida qaýiptirek bul variant qazir álemniń júzden astam elinde anyqtalyp, dominant variantqa ainalyp keledi.
Zertteýler qolda bar vaktsinalardyń "delta" variantynan qorǵai alatynyn kórsetip otyr.
19 shildedegi derek boiynsha, Qazaqstanda 4 million 895 myń adam koronavirýs ekpesiniń kemi bir komponentin saldyrǵan. Ekpeni tolyq alǵandar 2,8 million adamǵa jýyqtady.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady. Keiingi aptada sońǵy ekeýiniń qory sarqylyp qalǵan. Al QazVac ekpesiniń kólemi óndiris qýatynyń álsizdigine bailanysty shekteýli bolyp otyr.
