21 shildede Qazaqstanda 5708 adamnyń koronavirýs testi oń nátije kórsetti. Indet bastalǵaly beri bir kúnde osynsha kóp naýqas tirkelmegen. Eki kún buryn 34 adamǵa koronavirýs pnevmoniiasy juqqan. Densaýlyq saqtaý ministrliginiń beisenbi kúngi habarlamasynda osyndai aqparat jazylǵan.
Ministrlik koronavirýspen bailanysty adam ólimi kórsetkishine bailanysty eki kún burynǵy málimetti jariialaidy. 20 shildede 77 adam koronavirýs pen koronavirýs pnevmoniiasynan qaitys boldy.
Keiingi aptalarda buryn-sońdy bolmaǵan koronavirýs kórsetkishteri tirkelip jatyr. Densaýlyq saqtaý salasynyń mamandary muny "delta shtammen" bailanystyrady. Ol virýstyń kádimgi túrine qaraǵanda áldeqaida tez juǵady ári ýshyǵýy da jyldam.
Qazir Nur-Sultanda kún saiyn ortasha eseppen 1200-1300 adamnan koronavirýs anyqtalyp júr. Bul ó respýblika boiynsha eń joǵary kórsetkish. Bir táýlikte Almatyda (ótken táýlikte 993) men Qaraǵandy oblysynda (698) júzdegen naýqas anyqtalyp jatyr. Qalǵan oblystar men qalalarda 90 men 450 aralyǵynda naýqas tirkelip júr.
Elde virýs kúsheidi. Qazir "jasyl aimaqta" birde-bir oblys ne qala qalǵan joq. Túrkistan men Shyǵys Qazaqstan oblysy "sary aimaqta". Qalǵan oblystar men qalalar "qyzyl aimaqta" tur.
Indet bastalǵaly beri 509 myńnan astam adamnyń koronavirýs testi oń shyqqan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Budan bólek PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 58 myńnan astam adam shaldyqqan.
2020 jyldyń naýryz aiynan beri koronavirýs testi oń shyqqandar arasynda 5180 adam qaitys bolǵan. 3575 adam koronavirýs pnevmoniiasynan kóz jumǵan.
22 shildedegi málimet boiynsha 67 475 adam koronavirýs infektsiiasynan (65 808 KVI+ jáne 1 667 KVI-) emdelip jatyr. Olardyń ishinde 20 526 patsient - statsionarda, 46 949 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
1 190 adamnyń jaǵdaiy aýyr,
272 patsienttiń jaǵdaiy óte aýyr,
168 naýqas ÓJJ apparatynda jatyr.
Buǵan deiin aýrýhanalarda oryn jetpei jatqany habarlandy. Keibir qalalarda qonaq úiler, sport keshenderi infektsiialyq statsionarǵa ainaldy.
22 shildedegi derek boiynsha, Qazaqstanda 5 million adam koronavirýs ekpesiniń kemi bir komponentin saldyrǵan. Ekpeni tolyq alǵandar 3 millionǵa jýyqtady.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady.
Koronavirýs juqtyrǵandardyń aimaqtar boiynsha kórsetkishi: Nur-Sultan qalasynda - 1369, Almaty qalasynda - 993, Shymkent qalasynda – 418, Aqmola oblysynda – 186, Aqtóbe oblysynda - 192, Almaty oblysynda - 178, Atyraý oblysynda - 386, Shyǵys Qazaqstan oblysynda - 107, Jambyl oblysynda - 97, Batys Qazaqstan oblysynda - 170, Qaraǵandy oblysynda - 698, Qostanai oblysynda - 149, Qyzylorda oblysynda - 139, Mańǵystaý oblysynda - 207, Pavlodar oblysynda - 197, Soltústik Qazaqstan oblysynda - 99, Túrkistan oblysynda - 123.
Sondai-aq, elde 2 487 adam koronavirýs infektsiiasynan jazylyp shyqqan:
Nur-Sultan qalasynda - 283,
Almaty qalasynda - 240,
Shymkent qalasynda - 115,
Aqmola oblysynda - 129,
Aqtóbe oblysynda - 0,
Almaty oblysynda - 81,
Atyraý oblysynda - 170,
Shyǵys Qazaqstan oblysynda - 43,
Jambyl oblysynda – 102,
Batys Qazaqstan oblysynda - 222,
Qaraǵandy oblysynda - 575,
Qostanai oblysynda - 91,
Qyzylorda oblysynda - 46,
Mańǵystaý oblysynda - 150,
Pavlodar oblysynda - 160,
Soltústik Qazaqstan oblysynda - 48,
Túrkistan oblysynda - 32.
