Qazaqstanda Covid-19 juqtyrǵandar 1730 adamǵa kóbeidi. Bul týraly 26 maýsymda eldegi epidemiia ahýaly týraly resmi habar taratatyn Coronavirus2020 saity habarlady. 54 adam koronavirýs pnevmoniiasyna shaldyqqan.
Resmi derek boiynsha, 24 maýsymda 14 adam koronavirýstan, taǵy 3 adam soǵan uqsas pnevmoniiadan qaitys bolǵan.
Senbiden bastap Almaty qalasy men Atyraý, Batys Qazaqstan jáne Qaraǵandy oblystary koronavirýstyń taralýyna bailanysty "qyzyl aimaqqa" ótti. Buǵan deiin "qyzyl aimaqta" koronavirýs juqtyrǵandar kún saiyn kóbeiin jatqan Nur-Sultan qalasy ǵana bolǵan edi. "Sary aimaqtaǵy" Shymkent qalasy men Mańǵystaý oblysyna búgin Qostanai oblysy da qosyldy.
Qazaqstanda koronavirýstyń "úndi shtamy" anyqtalǵan shaqta naýqas sany qaita kóbeiip jatyr. 27 maýsymnan bastap el astanasynda karantin qaita kúsheiedi: kópshilik qatysatyn toi-tomalaq, saýyq sharasymen birge miting, sherý ótkizýge de tyiym salynady. Sanitarlyq dárigerdiń qaýlysyna sáikes, azamattar qoǵamdyq oryndarda maska taǵýǵa, antiseptik qoldanyp, ara qashyqtyqty saqtaýy kerek. Ashyq jobasyna qatysatyn nysandarǵa kirý úshin adamdar osy qosymsha arqyly statýsyn tekserýge mindetti.
Byltyrǵy naýryzdan beri Qazaqstanda 416 442 adamǵa koronavirýs juqqan. 4295 adam kóz jumdy. Buǵan qosa elde koronavirýs pnevmoniiasyna shaldyqqandardyń jiyntyq sany 56 840 adamǵa jetti. Osy ýaqytqa deiin bul dertten 3440 adam qaitys boldy. Bilik Covid pen koronavirýs pnevmoniiasyna shaldyqqandardy eki bólek esepteidi. Biraq halyqaralyq uiymdar dereginde eki kórsetkish biriktirilgen.
Resmi málimet boiynsha, Qazaqstanda 3 mln-ǵa jýyq adam koronavirýsqa qarsy vaktsinanyń keminde bir dozasyn alǵan. 1,8 mln-nan astamy ekpeniń eki dozasyn alǵan. Elde reseilik "Spýtnik V", qazaqstandyq QazVac jáne Qytai shyǵarǵan Sinopharm men "Sinovac Biotech Ltd" kompaniiasynyń CoronaVac (Sinovac) vaktsinasyn egý sharasy ótip jatyr.
Amerikalyq Djons Hopkins ýniversitetiniń dereginshe, indet bastalǵaly beri álemde 180 mln-nan astam adamnyń koronavirýs juqtyryp alǵany anyqtalǵan. 4 mln-ǵa jýyq adam qaitys bolǵan.
Ótken táýlikte aimaqtar boiynsha koronavirýs juqtyrǵandar sany:
- Nur-Sultan qalasynda - 628,
- Almaty qalasynda - 217,
- Shymkent qalasynda – 73,
- Aqmola oblysynda – 32,
- Aqtóbe oblysynda - 31,
- Almaty oblysynda - 41,
- Atyraý oblysynda - 89,
- Shyǵys Qazaqstan oblysynda - 82,
- Jambyl oblysynda - 34,
- Batys Qazaqstan oblysynda - 98,
- Qaraǵandy oblysynda - 219,
- Qostanai oblysynda - 36,
- Qyzylorda oblysynda - 28,
- Mańǵystaý oblysynda - 39,
- Pavlodar oblysynda - 35,
- Soltústik Qazaqstan oblysynda - 21,
- Túrkistan oblysynda - 27.
