22 shildede Qazaqstanda 6119 adamnyń analizinen koronavirýs anyqtaldy. Indet bastalǵaly beri alǵash ret bir kúnde anyqtalǵan naýqas sany 6 myńnan asyp otyr.
Qazir Qazaqstannyń barlyq óńirinde virýs kúsheigen. Koronavirýs boiynsha "jasyl aimaqta" birde-bir oblys ne qala qalmady.
«Qyzyl» aimaqta: Nur-Sultan, Almaty, Shymkent qalalary, Almaty, Aqmola, Aqtóbe, Atyraý, Batys Qazaqstan, Jambyl, Qaraǵandy, Qostanai, Qyzylorda, Mańǵystaý, Pavlodar jáne Soltústik Qazaqstan oblystary.
«Sary» aimaqta: Túrkistan jáne Shyǵys Qazaqstan oblystary.
Indet ásirese Nur-Sultan men Almatyda ýshyǵyp tur. Bir kún buryn astananyń densaýlyq saqtaý salasy mamandary infektsiialyq aýrýhanadaǵy oryndardyń 72 paiyzy tolyp ketkenin habarlaǵan. Almatyda infektsiialyq statsionarlar jartylai tolǵan. Eki qalada kún saiyn shamamen 300-400 adam aýrýhanaǵa túsedi. Koronavirýs juqtyrǵandardy jatqyzatyn qosymsha oryndar ázirlenip jatyr.
Ótken táýlikte Nur-Sultanda 1381 adamnan koronavirýs anyqtaldy. Almatyda – 996, Qaraǵandy oblysynda 794 naýqas tirkelgen. Qalǵan oblystar men qalalarda bir táýlikte anyqtalǵan naýqastar 500-ge jetpeidi. 22 shildede eń tómen kórsetkish Shyǵys Qazaqstan oblysynda (78) tirkelgen.
Indet bastalǵaly beri 516 myńnan astam adamnyń koronavirýs testi oń shyqqan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq Dúniejúzilik densaýlyq saqtaý uiymynyń nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Budan bólek PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 59 myńnan astam adam shaldyqqan. 21 shildede 233 adamnyń koronavirýs pnevmoniiasyna shaldyqqany belgili boldy.
2020 jyldyń naýryz aiynan beri koronavirýs testi oń shyqqandar arasynda 5,2 myń adam qaitys bolǵan. 3,5 myń adam koronavirýs pnevmoniiasynan kóz jumǵan.
21 shildede 64 adam - koronavirýstan, 10 adam koronavirýs pnevmoniiasynan kóz jumǵan.
23 shildedegi málimet boiynsha, elde 71 221 adam koronavirýs infektsiiasynan (69 436 + jáne 1 785 KVI -) emdelip jatyr. Olardyń ishinde 21 096 patsient statsionarda, 50 125 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 258 adamnyń jaǵdaiy aýyr,
• 274 patsienttiń jaǵdaiy óte aýyr,
• 166 naýqas ÓJJ apparatynda jatyr.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5 millionnan astam adam vaktsinanyń birinshi dozasyn alǵan. Ekpeniń tolyq dozasyn alǵandar 3 millionnan asty.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady.
Koronavirýs juqtyrǵandardyń aimaqtar boiynsha ótken táýliktegi kórsetkishi:
Nur-Sultan qalasy - 1381,
Almaty qalasy - 996,
Shymkent qalasy - 488,
Aqmola oblysy - 189,
Aqtóbe oblysy - 230,
Almaty oblysy - 230,
Atyraý oblysy - 489,
Shyǵys Qazaqstan oblysy - 78,
Jambyl oblysy - 105,
Batys Qazaqstan oblysy - 235,
Qaraǵandy oblysy - 794,
Qostanai oblysy - 156,
Qyzylorda oblysy - 129,
Mańǵystaý oblysy - 205,
Pavlodar oblysy - 203,
Soltústik Qazaqstan oblysy - 110,
Túrkistan oblysy - 101.
