Qazaqstanda «Anashym, biz úidemiz» telejobasy bastalady. Bul týraly búgin Ortalyq kommýnikatsiialar qyzmetindegi baspasóz máslihatynda QR Aqparat jáne qoǵamdyq damý ministri Dáýren Abaev jariia etti, dep habarlaidy QazAqparat tilshisi.
«Áleýmettik az qamtylǵan otbasylardy demeý elimizdegi basty baǵyttardyń biri. Mysaly, jyl saiyn kópbalaly otbasylardy qoldaý maqsatynda kóptegen memlekettik baǵdarlamalar júzege asyrylýda. Aǵymdaǵy jyldyń ózinde ataýly áleýmettik kómekpen qatar 40 myń jaldamaly páter qurylysyna qatysty jańa is-sharalar qolǵa alyndy. Aqparat jáne qoǵamdyq damý ministrligi de kópbalaly otbasylarǵa bailanysty bastamalardy qoldaýǵa árdaiym daiyn. Osy oraida memlekettik aqparattyq tapsyrys aiasynda «31-arnamen» birigip «Anashym, biz úidemiz» dep atalatyn jańa jobany kórermenge usynyp otyrmyz», - dedi ministr.
Osy oraida ol páterdi jóndeý búgingi tańda ásirese kópbalaly otbasylar úshin eń ózekti máselelerdiń biri bolyp otyrǵanyn basa aitty.
«Otandyq teleónim arqyly osy máseleniń sheshimin tabamyz dep oilaimyz. Páterler men úiler tolyq jańaryp, jobadaǵy árbir otbasy músheleriniń ómir súrýi úshin barynsha yńǵaily baspanalarǵa ainalady. «Anashym, biz úidemiz» jobasynyń keiipkerlerimen de kórermen jan-jaqty tanysady. Otbasynyń turmysy, taǵdyry eshkimdi de bei-jai qaldyrmaidy dep oilamyn», - dedi Dáýren Abaev.
Aita keteiik, jobany daiyndaý búgin bastaldy. Oǵan qatysý úshin ótinimdi dom@31.kz elektrondyq poshtasyna jiberý nemese +7 7082677326 nómiri arqyly joba úilestirýshilerine bailanysý qajet. Al 11 tamyzdan bastap «31-arna» kórermenderi ár otbasymen jeke tanysyp qana qoimai, olardyń páterleri men úileriniń barynsha kórkeigenine kýá bolady.
