QR Premer-Ministri Asqar Maminniń tóraǵalyǵymen ótken Úkimet otyrysynda 2020 jylǵy qańtar-tamyzdaǵy QR áleýmettik-ekonomikalyq damý qorytyndysy jáne respýblikalyq biýdjettiń atqarylýy qaraldy. Biyl 8 aidaǵy elimizdiń ónerkásip salasyndaǵy jumys nátijeleri týraly indýstriia jáne infraqurylymdyq damý ministri Beibit Atamqulov baiandady.
Ministr habarlaǵandai, a.j. 8 aidyń qorytyndysy boiynsha ónerkásip óndirisiniń kólemi 0,4% ósti.
Taý-ken óndirý sektorynda tústi kenderdi óndirý quramynda altyn bar kendi óndirýdi artýy esebinen 1,4% ósti. Temir ken óndirý kólemi 0,9% ósti. Kómir ónimderin tutyný kóleminiń artýyna bailanysty ósim 1,2% qurady.
«Óńdeý ónerkásibinde naqty kólem indeksi tústi metallýrgiia, farmatsevtika, jeńil ónerkásip, mashina jasaý, himiia jáne basqa da salalar esebinen 3,3% ósti. Tústi metallýrgiiada óndiris kólemi tazartylǵan altyn óndirý kólemin 3%, bastapqy aliýminiidi 1%, quima altyn 30%, túiirshikterdegi kúmis 28% jáne basqa da kórsetkishterdiń ósýine bailanysty naqty kólem indeksi 2,7% artty», — dedi B. Atamqulov.
Qara metallýrgiiada naqty kólem indeksi 97,8% qurady. Bul kórsetkish bolattyń, relsterdiń, bolat qubyrlardyń, shoiyn óndirisi kóleminiń tómendeýine bailanysty boldy.
Himiia ónerkásibinde óndiris kólemi 3,1% ósti. Bul dezinfektsiialyq quraldar jáne mineraldy tyńaitqyshtardyń óndirý kóleminiń ulǵaiýyna bailanysty.
«Mashina jasaý salasy jaqsy nátije kórsetip, óndiris kólemi 16,3% ósti. Avtokólik quraldary, treilerler jáne jartylai tirkemeler 51,8%, mashinalar men jabdyqtardy jóndeý jáne ornatý 2,8%, ózge kólik quraldaryn jasaý 101,4%, elektr jabdyqtardy jasaý 0,2% ósti», — dedi ministr.
Farmatsevtika ónerkásibinde óndiris kólemi 34,1% artty. «SQ-Farmatsiia» distribiýtory arqyly Tegin meditsinalyq kómektiń kepildik berilgen kólemi sheńberinde dárilik zattar men meditsinalyq buiymdardy jetkizý kólemi ulǵaityldy.
Jeńil ónerkásipte óndiris 11% ósti. Ol toqyma buiymdary óndirisiniń 7,2% jáne bylǵary ónimderdiń 66,2% ulǵaiýyna bailanysty boldy.
Kólik salasynda naqty kólem indeksi 2020 jyldyń qańtar-tamyz ailarynda 83,9% qurady. Konteinerlerdiń tranzittik tasymaldarynyń kólemi ótken jyldyń sáikes kezeńimen salystyrǵanda 37% artyp, 564 myń jiyrma fýnttyq balamany qurady.
Vedomstvo basshysy habarlaǵandai, kóliktiń barlyq túrlerimen júk tasymaldaý kólemi 2,5 mlrd tonnany qurap, 7,5% tómendedi.
«Qurylys salasynda naqty kólem indeksi 2020 jyldyń qańtar-tamyz ailarynda 106,5% qurady. Ósim qurylys kólemin arttyrý esebinen qamtamasyz etiledi. 16 óńirde oń dinamika baiqalady», — dedi ministr.
Turǵyn úi qurylysynda biyl 8 aidyń qorytyndysynda 8 mln 100 myń sharshy metr turǵyn úi paidalanýǵa berildi, bul ótken jyldyń sáikes kezeńimen salystyrǵanda 106,4%.
Búgingi tańda respýblika boiynsha barlyǵy 71 457 baspana paidalanýǵa berildi. Ótken jylmen salystyrǵanda, turǵyn úidi paidalanýǵa berý kóleminiń artýy 14 óńirde baiqalady.
