QR Strategiialyq josparlaý jáne reformalar agenttiginiń Ulttyq statistika biýrosy ziiandy jáne qolaisyz eńbek jaǵdaiynda jumys isteitin qyzmetkerler sanyn jariia etti, dep habarlaidy "Ult aqparat".
«Ziiandy jáne basqa da qolaisyz eńbek jaǵdailarynda jumys isteitin qyzmetkerlerdiń sany týraly aqparatty alý maqsatynda QR Strategiialyq josparlaý jáne reformalar agenttiginiń Ulttyq statistika biýrosy ekonomikalyq qyzmettiń jekelegen túrlerindegi kásiporyndar men uiymdarǵa jyl saiyn zertteý júrgizedi. Zertteýde aýyl, orman jáne balyq sharýashylyǵy, ónerkásip, qurylys, kólik jáne bailanys, densaýlyq saqtaý jáne halyqqa áleýmettik qyzmet kórsetý, ǵylym jáne qyzmet kórsetý salasyndaǵy kásiporyndar qamtylady», - delingen biýro aqparatynda.
Vedomstvo málimetinshe, zertteý nátijesinde sanitarlyq-gigienalyq talaptarǵa (normalarǵa) sai kelmeitin jaǵdailarda 366,9 myń adam nemese zerttelgen kásiporyndaǵy qyzmetkerlerdiń jalpy sanynyń 22,3 paiyzy jumys isteitindigi anyqtalǵan. Onyń ishinde shýdyń jáne dirildiń joǵary deńgeii jaǵdaiynda 169,8 myń adam, ShUK-dan (shekteýli uiǵaryndy kontsentratsiiadan) asatyn jumys aimaǵyndaǵy aýanyń gazdanýy men shańdanýy áserinde – 119,7 myń adam, qolaisyz temperatýralyq rejimde – 62,2 myń adam, basqa qolaisyz faktorlarda – 15,2 myń adam eńbeketken. Aýyr dene eńbegimen shuǵyldanatyn qyzmetkerler sany - 94,3 myń adam.
2020 jyly kásiporyndar (uiymdar) ziiandy jáne basqa da qolaisyz eńbek jaǵdailaryndaǵy jumysy úshin ótemaqylar men jeńildikterge 141 545,8 mln teńge jumsady. Qosymsha demalys (jeńildiktiń túri) 520,6 myń adamǵa berildi. Ziiandy jáne jáne basqa da qolaisyz eńbek jaǵdaiyna ártúrli materialdyq qosymsha tólemderdi 392,1 myń adam paidalandy. 322,9 myń adam sút nemese teń baǵaly taǵam ónimderin tegin aldy. 79,8 myń adam tegin emdik-profilaktikalyq tamaqtanýmen qamtamasyz etildi. Al 47,1 myń adam qysqartylǵan jumys kúni rejiminde jumys istedi.
