Qazaqstan halqynyń sanaǵyn júrgizýdi 2020 jylǵa aýystyrý josparlanyp otyr, dep habarlaidy "Ult aqparat" QR Ulttyq ekonomika ministrliginiń Statistika komitetine silteme jasap.
Komitettiń málimetinshe, Qazaqstan zańnamasy jáne halyqaralyq usynystar boiynsha, halyq sanaǵy keminde on jylda bir ret júrgiziledi. Bul halyq sanaǵyn júrgizý merzimderiniń kezekti álemdik raýndtarmen salystyrmalylyǵyn qamtamasyz etý úshin jasalady. Sondyqtan sanaq júrgizý arasynda on jyldyq merzimdi saqtaýǵa Qazaqstan úshin 2019 jylǵy qazan men 2020 jylǵy qazan aiy arasyndaǵy merzim qolaily.
Qazaqstanda halyq sanaǵyn júrgizýge daiyndyq 2017 jyly bastalyp ketken. Halyqaralyq ádisteme boiynsha, sanaq júrgizý úshin eń qolaily merzim - turǵyndar mobildiligi eń tómen kezeń (kúzgi-qysqy maýsym) bolyp tabylady. Iaǵni bul kezeń turǵyndardy qamtý jáne jinalǵan málimetter sapasy turǵysynan tabysty ótkizilýine kóp múmkindik beredi.
«Osyǵan bailanysty 2020 jyly halyq sanaǵyn júrgizýdiń eń qolaily merzimderi aqpan-naýryz ailary bolyp tabylady. Ulttyq sanaqty júrgizýmen bailanysty birqatar uiymdastyrýshylyq jáne nusqaýlyq sátterdi esepke ala otyryp, QR halqynyń ulttyq sanaǵyn 2020 jyldyń basynda ótkizý týraly sheshim qabyldandy», - dep málim etti vedomstvodan.
Qazirgi kezde Úkimettiń «2020 jyly Qazaqstan Respýblikasy ulttyq halyq sanaǵyn ótkizý týraly» qaýlysynyń jobasy memlekettik organdar jáne jergilikti atqarýshy organdar, akkredittelgen uiymdar, «Atameken» Ulttyq kásipkerler palatasymen kelisý ústinde, sondai-aq QR Ulttyq ekonomika ministrliginiń internet-resýrsynda talqylaý úshin qoljetimdi.
«Qaýly jobasyn kelisý jáne qabyldaý jadaiynda, últtyq halyq sanaǵyn 2020 jyldyń 5 aqpany men 5 naýryz aralyǵynda ótkizý josparlanyp otyr», - dep málim etti baspasóz qyzmetinen.
