Densaýlyq saqtaý ministri Aleksei Tsoi Qazaqstanda jynys aýystyrý operatsiiasy memleket esebinen júrgizilmeitinin málimdedi, dep habarlaidy Sputnik.
Ministr ótken jyldyń sońynda jynys aýystyrý týraly buiryqqa nege qol qoiǵanyn túsindirdi.
Jynys aýystyrý – burynnan qozǵalyp kele jatqan másele ekenin atap ótken ministr 2003 jyldan beri osyǵan qatysty qabyldanǵan búkil normativtik qujattyń birdei ekenin alǵa tartty.
Onyń aitýynsha, bul erejeler Keńes odaǵy kezinde de bolǵan. Tsoi ministrlikke qyzmetke kelgen kezde halyq densaýlyǵy týraly kodeks qabyldanyp, ony iske asyrý úshin normativtik quqyqtyq aktilerdi qaita shyǵarýǵa týra kelgen.
"Osylaisha, men maǵan deiin kóp jyl buryn bekitilgen buiryqty qaita basyp shyǵardym. Jalpy, Qazaqstanda jynys aýystyrý operatsiialary óte az jáne memleket esebinen tólenbeidi. Bul tek azamattardyń tańdaýy. Olar memleket biýdjetinen, qandai da bir saqtandyrý qory esebinen de tólem jasalmaidy", – dedi Tsoi Nartai Aralbaiulynyń YouTube-kanalyna bergen suhbatynda.
Osy rette jýrnalist ministrden "osy buiryqtan keiin kez kelgen adam klinikaǵa kelip, men jynysymdy aýystyrǵym keledi dep aita ala ma?" dep surady.
"Joq, árine. Munyń protsedýrasy óte kóp. Arnaiy komissiiadan ótý qajet. Sońǵy bes-alty jylda Qazaqstanda bul baǵytta eshqandai operatsiia jasalǵan joq. Eger ondai azamattar bolsa, olar shetelge shyqqan. Al Qazaqstanda memleket esebinen jasalmaidy jáne qarjylandyrý qarastyrylmaǵan", – dep atap ótti Tsoi.
Aita keteiik, naýryz aiynyń basynda jelide Qazaqstanda jynys aýystyrý otasy tegin jasalady degen aqparat tarady. Alaida densaýlyq saqtaý ministrligi muny joqqa shyǵardy.
Vedomstvo kepildendirilgen tegin meditsinalyq kómektiń tizimine jynys aýystyrý otasynyń kirmeitinin eskertti.
