Qazaqstanda sýdianyń qaraýyn talap etpeitin daýsyz ister boiynsha robot sheshim shyǵarady. «Sýdianyń smart kómekshisi» jobasy týraly QR Joǵarǵy Sotynyń resmi ókili Aidos Sádýaqasov aityp berdi, dep habarlaidy QazAqparat tilshisi.
«Biz sot júiesine robot baǵdarlamasyn engizýdi bastap kettik. Osy baǵdarlama boiynsha sýdianyń qaraýyn talap etpeitin daýsyz ister iriktelip alynady. Statistika boiynsha, dál osyndai 400 myńǵa jýyq bar. Ásirese, shartty túrde merziminen bosatý, sanktsiialar jáne el aýmaǵynan shyǵyp ketý isteri negizinen sýdialardyń egjei-tegjeili qaraýyn talap etpeidi. Muny avtomattandyrylǵan baǵdarlama kómegimen júzege asyrýǵa bolady. Iaǵni, robot sot sheshimi jobasyn daiyndaidy. Sýdia tekserip, tek qolyn qoiady. Eger tehnikalyq qateler ketken jaǵdaida, sýdianyń qaita qarap shyǵý múmkindigi bar», - dedi spiker Ortalyq kommýnikatsiialar qyzmetindegi baspasóz máslihatynda.
Sondai-aq, Joǵarǵy sot «Atameken» palatasymen birlesip, «Tsifrlyq taldaý» jobasyn ázirlep jatyr.
«Azamattar óz daýlarynyń qalai aiaqtalatynyn osy baǵdarlama kómegimen bile alady. Intellektýaldy izdeý júiesi men arnaiy kilt sózder arqyly respýblikadaǵy uqsas daýlardyń qalai qaralǵanyn, onda qandai sheshimder qabyldanǵanyn bile alady. Osylaisha, talap aryzdardyń sapasy artady jáne sotqa aryzdy bergen durys pa, bergen jaǵdaida qansha paiyzǵa jeńip shyǵý yqtimaldyǵy bar – osynyń bárin «Tsifrlyq taldaý» qyzmeti aldyn ala aityp beredi», - dedi A. Sádýaqasov.
