2019 jyldyń basynda yntymaqty zeinetaqynyń indeksatsiiasy júrgiziledi. Sáikesinshe onyń mólsheri ósedi. Bul týraly eńbek jáne halyqty áleýmettik qorǵaý ministri Mádina Ábilqasymova málimdedi, dep habarlaidy Sputnik Qazaqstan tilshisi.
Ministr zeinetaqy indeksatsiiasy elimizde ár jyl saiyn jyldyń basynda júrgiziletinin aitty.
"Memleket basshysynyń tapsyrmasymen zeinetaqy infliatsiia deńgeiinen 2 protsentke artyq kórsetkishpen indeksteledi. Biyl biz indeksatsiiany 9%-pen júrgizdik. 2019 jyldyń 1 qańtarynan bastap infliatsiia deńgeiine taǵy 2% qosyp, indeksatsiia júrgizemiz", — dedi Ábilqasymova májilis kýlýarynda.
Vedomstvo basshysy Qazaqstanda zeinetaqy TMD elderine qaraǵanda edáýir joǵary ekenin atap ótti.
"Osy jyldyń 1 shildesinen bastap bazalyq zeinetaqynyń jańa formaty engizilgenin bilesizder. Ortasha eseppen bazalyq zeinetaqy 67%-ke ósti. 1 millionǵa tarta zeinetker bazalyq zeinetaqyny kúnkóris deńgeiiniń 100% mólsherinde alady. Iaǵni olar úshin zeinetaqy eki esege ósken. Qazir Qazaqstanda zeinetaqy mólsheri barlyq kórshiles, TMD elderimen salystyrǵanda joǵary. Zeinetaqynyń ortasha mólsheri (bazalyq, yntymaqty jáne jinaqtaýshy zeinetaqyny esepke alǵanda) 101 myń teńgeni quraidy", — dedi ol.
Ábilqasymova memleket jinaqtaýshy zeinetaqynyń saqtalýyna kepildik beretinin aitty.
"Eger infliatsiianyń barlyq jiyntyq deńgeiine qarai indekstelgen jinaq az bolyp qalsa, onda osy aiyrmashylyqty biz memleket esebinen óteimiz. Bul qarjy daǵdarysy, valiýta baǵamynyń qubylmalyǵy kezinde týyndaǵan táýekelderge jaýap berýge múmkindik beredi", — dedi ol.
