Parlament Májilisiniń depýtaty Gúlshara Ábdiqalyqova kedeilik shegin odan ári eń tómengi kúnkóris deńgeiine deiin ulǵaitý týraly aitty, dep habarlaidy QazAqparat.
«Búgingi tańda Qazaqstanda kedeilikti baǵalaýdyń deńgeii – eń tómengi kúnkóristiń 70 paiyzy (20 789 teńge). Halyqaralyq sarapshylar kedeilik sheginiń ońtaily deńgeii eń tómengi kúnkóris deńgeii bolyp tabylatynyn atap ótti. Bizdiń oiymyzsha, kedeilik shegin odan ári eń tómengi kúnkóris deńgeiine deiin ulǵaitýdy qamtamasyz etýge múmkindik beretin teńdestirilgen qarjy-ekonomikalyq model qurý memlekettik organdardyń ózekti mindetteriniń biri bolýǵa tiis. Bul rette eń tómengi kúnkóris shamasynyń ózi halyqtyń naqty satyp alý qabiletine sáikes kelýge jáne adamnyń barynsha az qajettilikterine jaýap berýge tiis. Bul jumys bastalyp ketti. Osy jyldyń 1 sáýirinen bastap ataýly áleýmettik kómek kórsetý ólshemsharty eń tómengi kúnkóristiń 50-den 70 paiyzyna deiin ulǵaitylǵanyn, al tabysy az otbasynan shyqqan árbir balaǵa áleýmettik kómektiń kepildi mólsheri belgilengendigin bilesizder», - dedi G. Ábdiqalyqova Májilistegi Úkimet saǵatynda.
Osy oraida, ol bul qadam ataýly kómektiń mólsherin 2,5 ese arttyrýǵa múmkindik berdi.
Sonymen qatar, depýtat tabysy az azamattardy qoldaý salasynda oryn alǵan kemshilikterge toqtaldy.
«Bir qaraǵanda bári jaqsy siiaqty. Alaida tabysy az azamattardy qoldaý sharalaryn iske asyrý jańa formattaǵy ataýly kómektiń tiimdiligin tómendetetin birqatar eleýli kemshilikterdi anyqtady. Birinshi kezekte, memlekettik organdar oqiǵalardyń bulai órbýine daiyn emes bolyp shyqty. Júieli jumystyń bolmaýy saldarynan jaǵymsyz aspektilerge tap boldyq. Bul – jumys izdeý ýájiniń azaiýy, áleýmettik qamsyzdandyrýdy uzaq ýaqyt paidalaný nieti, áleýmettik kómekti kóbirek alý maqsatynda otbasy mártebesin nemese turǵylyqty jerin formaldy túrde ózgertý.
Jergilikti jerlerde ákimdikter tabysy az azamattardyń problemalaryn sheshýge kelgende ómirlik qiyn jaǵdaiǵa ákep soqqan sebepterge tereń úńilmeidi. Ministr óz sózinde atap ótkendei, atalǵan jaǵdaidy sheshý úshin sharalar qabyldanyp, áleýmettik kómekke muqtajdyqty aiqyndaý, ýchaskelik komissiialardyń rólin kúsheitý ólshemsharttary bekitildi.
Otbasyn jekedara alyp júrý tetigi otbasyn áleýmettik qoldaýdyń jańa formatynyń túiindi elementi bolýǵa tiis», - dedi depýtat.
