Kásibi sport klýbtaryn ustaýǵa jiberiletin qarajat aldaǵy ýaqytta halyqty, eń aldymen balalardy dene shynyqtyrýmen jáne buqaralyq sportpen ainalysýǵa tartýǵa baǵyttalmaq. Bul týraly Mádeniet jáne sport ministri Aqtoty Raiymqulova málim etti, dep habarlaidy "Ult aqparat".
«Memleket basshysy halyqqa Joldaýyn iske asyrý jónindegi Jalpyulttyq is-sharalar josparynda Mádeniet jáne sport ministrliginiń aldyna halyqty, onyń ishinde eń aldymen balalardy dene shynyqtyrýmen jáne buqaralyq sportpen ainalysýǵa belsendi tartý, sondai-aq sport sektsiialaryn ashý jáne «balalar úiirmeleriniń» qyzmetin qalpyna keltirý mindeti qoiyldy», - dedi Aqtoty Raiymqulova OKQ-da ótken baspasóz máslihatynda.
Onyń aitýynsha osy mindetterdi júzege asyrý maqsatynda Jalpyulttyq is-sharalar jospary sheńberinde Mádeniet jáne sport ministrligi jergilikti atqarýshy organdarmen birlesip, is sharalardy iske asyrýda. Atap aitqanda ol sharalar boiynsha kásibi sport klýbtaryn ustaýǵa jiberiletin qarajatty halyqty, eń aldymen balalardy dene shynyqtyrýmen jáne buqaralyq sportpen ainalysýǵa tartýǵa qaita baǵdarlaý kózdelýde. Sondai-aq barlyq oblysta, respýblikalyq mańyzy bar qalada jáne astanada, iri aýdan ortalyqtarynda sport sektsiialaryn ashý jáne «balalar úiirmeleriniń» qyzmetin qalpyna keltirý josparlanǵan.
«Joldaýda Memleket basshysy tarapynan qarjy tapshylyǵy kezinde memleket biýdjeti esebinen kásibi sport klýbtaryn tolyqtai qamtamasyz etýdiń qajeti joqtyǵy syn retinde aityldy. Búgingi kúni respýblika boiynsha 36 myńnan astam adam jattyǵatyn 97 birlik kásibi sport klýby bar. Otandyq kásibi sport klýbtarynyń kópshiligi jergilikti biýdjet esebinen jumys isteidi. Olardyń keibirine ulttyq kompaniialar nemese jeke menshik ieleri qoldaý kórsetedi», - dedi ol.
