Qarashada Qazaqstanda áleýmettik mańyzy bar azyq-túlik taýarlarynyń qymbattaýy báseńdedi. Aidyń birinshi aptasynda jalpy azyq-túlik qorjyny boiynsha baǵa ósýi baiqalmady, biraq 19 taýardyń 8-i boiynsha baǵa 0,4 paiyzǵa, al taǵy bes taýardyń baǵasy 1-2 paiyzǵa ósti, - dep habarlaidy Tengrinews.kz tilshisi Energyprom.kz saityna silteme jasap.
Sarapshylar málimetinshe, jalpy jyl basynan beri azyq-túlik qorjynyndaǵy ósim 10,4 paiyz boldy.
Qazanda Qazaqstanda infliatsiia deńgeii 8,9 paiyzǵa jetip, oǵan eń kóp áser etken azyq-túlik ónimderi boldy. Azyq-túlik taýarlary bir jylda 11,3 paiyzǵa (jyl basynan beri 8,2 paiyzǵa) qymbattady.
Biyl azyq-túliktiń qymbattaýy jalpy álemdik úrdis boldy. Eýroodaqta biyl qazanda azyq-túlik baǵasy 2 paiyzǵa, AQSh-ta 5,3 paiyzǵa qymbattady. Birikken Ulttar Uiymynyń Azyq-túlik jáne aýyl sharýashylyǵy uiymynyń (FAO) azyq-túlik baǵasynyń indeksi qazanda 133,2 tarmaq boldy – qyrkúiektegi kórsetkishten 3,9 tarmaqqa (3 paiyz) jáne 2020 jylǵy qazandaǵy kórsetkishten 31,8 tarmaqqa (31,3 paiyz) joǵary boldy. Keiingi úsh aida bul kórsetkish 2011 jyldyń maýsymynan bergi eń joǵary deńgeige jetti.
Qazaqstanda bidai baǵasy bir jylda 16,5 paiyzǵa, un-jarma jáne krahmal ónimderin ónerkásiptik óndirýshiler baǵasy 16 paiyzǵa ósti.
Áleýmettik mańyzy bar azyq-túlik taýarlarynyń tiziminde kúnbaǵys maiy, kókónister, qant jáne qaraqumyq jarmasy qymbattady. Bul sanattarda agroónerkásiptik keshen ónimderin óndirýshiler, sondai-aq óńdeý segmentin óndirýshiler baǵasynyń kúrt ósýi baiqalady. Mysaly, kúnbaǵys maiy bólshek saýdada jylyna 56,2 paiyzǵa qymbattady. Bul rette aýyl sharýashylyǵy taýaryn óndirýshilerdegi kúnbaǵys tuqymdary 40,6 paiyzǵa qymbattady, al ónerkásiptik óndirýshiler óz ónimderi baǵasyn birden 59,3 paiyzǵa kóterdi.
Sonymen qatar, shiki sút fermerlerde 10,2 paiyzǵa qymbattady, sút pen irimshikti óńdeý segmentinde baǵalar tek 4,6 paiyzǵa ósti, nátijesinde bólshek saýdadaǵy sút baǵasy tek 5-8 paiyzǵa ósti.
Eger ónimder Qazaqstanda óndirilmese, negizinen eksport esebinen keletin jaǵdai basqasha qalyptasady. Qant óndirýshiler óz ónimi qunyn 14 paiyzǵa arttyrdy, al bólshek saýdada qant 25 paiyzǵa qymbattady. Sonymen qatar, biylǵy úsh toqsanynyń qorytyndysy boiynsha jergilikti qant zaýyttary sektordaǵy suranystyń tek 44,5 paiyzyn jaba aldy.
