Elimizde qansha kólemdegi sý resýrsy qory bar? Bul suraqqa QR Ekologiia, geologiia jáne tabiǵi resýrstar ministri Maǵzum Myrzaǵaliev jaýap berdi, dep habarlaidy QazAqparat.
«Búgin qarastyratyn suraqtar elimizdiń sý máselelerine qatysty bolmaq. Sý – tirshilik kózi, el ekonomikasynyń turaqty damýyn qamtamasyz etetin mańyzdy faktorlardyń biri. Sondyqtan da sý qaýipsizdigi máseleleri úlken mańyzǵa ie. Aldymen ózenderdiń aǵyny qalai qalyptasatyny týraly qysqasha aityp keteiin. Qazaqstannyń qolda bar sý resýrstary, jer asty sýlary men ózen aǵysynyń qorlarynan turady. Ózen resýrstarynyń naqty kórsetkishteri sońǵy jyldary shamamen 90-100 tekshe km quraidy. Onyń ishinde 50,8 tekshe km jergilikti aǵyn, al 39,2 tekshe km Qytaidan, Ortalyq Aziia elderinen jáne Reseiden transshekaralyq ózender arqyly kelip túsedi. Sonymen qatar Resei Federatsiiasyna ketetin aǵyn jylyna orta eseppen 16,5 tekshe shaqyrymdy quraidy», - dedi Myrzaǵaliev.
Sondai-aq, ministr jerasty sý qorymen qatar qajetti sý kólemi jaily aityp ótti.
«Sonymen qatar 3,5 myńnan astam ken oryndarynda 15,5 tekshe shaqyrym kóleminde jerasty sýlarynyń rastalǵan qory bar. Geografiialyq turǵydan olar birkelki bólinbegen batystaǵy ken oryndarynyń 20%-dan kem bolsa, ortalyq, soltústik jáne shyǵys aimaqtarda 30% jáne eldiń ońtústiginde – shamamen 50%-y quraidy. Jalpy ekologiialyq qajettilikterge shamamen 50 tekshe shaqyrym sý qajet. Paidalanylatyn sýdyń jalpy kólemi shamamen 25 tekshe shaqyrym quraidy. Onyń ishinde aýyl sharýashylyǵyna – 15 tekshe shaqyrym (65%), ónerkásipke – 6) tekshe shaqyrym (30%) jáne kommýnaldyq sharýashylyqqa – 1 tekshe shaqyrym (5%) tiesili. Sondai-aq tasymaldaý kezindegi shyǵyndar 3 tekshe shaqyrymdy quraidy», - deidi ol.
Aita keteiik, búgin QR ekologiia, geologiia jáne tabiǵi resýrstar ministrliginde Úkimettik emes uiym ókilderi jáne ekologiia belsendilerdiń qatysýymen elimizdegi sý resýrsy máselelerine arnalǵan onlain kezdesý ótip jatyr.
