Búginde "pedofil" sanaty boiynsha 1350 adam ishki ister organdarynyń esebinde tur. Bul týraly ishki ister ministriniń birinshi orynbasary Marat Qojaev málimdedi, dep habarlaidy Sputnik Qazaqstan.
"Qazir ishki ister organdarynyń esebinde "pedofil" sanaty boiynsha 1350 adam, al "zorlaýshy" sanaty boiynsha 2831 adam tur. Kámeletke tolmaǵandarǵa qarsy jynystyq sipattaǵy zorlyq-zombylyq jasaǵany úshin sottalǵan 1575 adam túzetý mekemelerinde jazasyn ótep jatyr", - dedi Qojaev OKQ-de ótken brifingte.
Onyń aitýynsha, sońǵy ýaqytta elimizde adam zorlaý oqiǵalary jiilegen.
"8 aidyń qorytyndysy boiynsha kámeletke tolmaǵandarǵa qarsy jynystyq sipattaǵy 589 zorlyq-zombylyq qylmysy tirkeldi. Kishkentai balalardy azǵyrý 5,5 %-ke tómendegen, alaida, ókinishke qarai, zorlaý men sekýsaldy sipattaǵy zorlyq-zombylyq kórsetkishi ósken", - dedi ministrdiń birinshi orynbasary.
Qojaevtyń aitýynsha, mundai árbir ekinshi qylmys úide, jataqhanalarda jasalady. Bir ókinishtisi, zorlyq-zombylyq qylmysynyń 77%-in jábirlenýshiniń óz jaqyndary jasaidy.
"Olar ákesi, ógei ákesi, týystary, kórshileri men tanystary. Mundai kezde qylmysty dáleldeý qiynǵa soǵady. Óitkeni bul isterde kýáger joq, aiyptaý negizine kámeletke tolmaǵan balanyń jaýaby ǵana alynady", - dedi ol.
Ishki ister ministrligi munyń aldyn alý úshin zorlaý qylmysyna beiim adamdardy anyqtaý jáne esepke alý jumysyn júrgizip jatyr.
