QR Premer-Ministriniń orynbasary Eraly Toǵjanov Úkimettiń keńeitilgen otyrysynda vaktsinalaý qarqyny tómen óńirlerdi atady, dep habarlaidy QazAqparat.
«Qyzmet kórsetý salasy jáne iri uiymdasqan ujymdar qyzmetkerlerin vaktsinalaý boiynsha talaptar kúsheitildi. Sonyń nátijesinde sońǵy aida vaktsinalaý qarqyny eki esege artty. Búginde elimizde 8,7 mln doza vaktsina qamtamasyz etildi, onyń ishinde 6,6 mln doza vaktsina salyndy. Bul rette birinshi komponentpen 4,2 mln asa adam nemese tiisti kontingenttiń 42,8 paiyzy egildi. Al ekinshi komponentpen 2,4 mln jýyq adam qamtyldy», - dedi Toǵjanov.
Degenmen Premer-Ministr orynbasary jekelegen óńirlerde vaktsinalaý tómen deńgeide ekenin aitty. Onyń ishinde Mańǵystaý oblysynda birinshi komponentpen tiisti kontingenttiń 21,5 paiyzy, Aqtóbe oblysynda – 34,9 paiyz, BQO – 35,5 paiyz ǵana egilgen.
«Sizdiń tapsyrmańyzǵa sáikes (Prezident – red.), Ashyq jobasy 13,5 myńnan asa biznes sýbektilerine pandemiia kezinde jumys isteýge múmkindik berdi. Nátijesinde 96 paiyz shaǵyn jáne orta biznestiń jumysy qalpyna keltirildi. Ashyq arqyly anyqtalǵan 11,5 myńnan asa karantin rejimin buzǵandarǵa, talapty saqtamaǵan myń sýbektige qatysty sharalar qabyldandy», - deidi Toǵjanov.
Aita keteiik, Memleket basshysy Qasym-Jomart Toqaevtyń tóraǵalymen Úkimettiń keńeitilgen otyrysy bastaldy. Beinebailanys rejiminde ótip jatqan otyrysta Ministrler kabinetiniń barlyq músheleri, oblystardyń, respýblikalyq mańyzy bar Nur-Sultan, Almaty, Shymkent qalalarynyń ákimderi qatysýda. Jiyn barysynda elimizdiń biylǵy jartyjyldyqtaǵy áleýmettik-ekonomikalyq damýy qorytyndylanbaq. Sondai-aq Qazaqstan Prezidenti pandemiiadan keiingi kezeńdegi ekonomikany damytýdyń mindetterin belgilep beredi dep kútilýde.
